ಬೆಂಗಳೂರು: ಸಿಲಿಕಾನ್ ಸಿಟಿಯಲ್ಲಿ ಹೆತ್ತ ತಾಯಿಯೇ ತನ್ನ ಪ್ರಿಯಕರನ ಜೊತೆ ಸೇರಿ 6 ವರ್ಷದ ಮಗಳನ್ನೇ ಉಸಿರುಗಟ್ಟಿಸಿ, ಹೊಟ್ಟೆಗೆ ಒದ್ದು ಕೊಲೆ ಮಾಡಿರುವ ಭೀಕರ ಆರೋಪ ಕೇಳಿಬಂದಿದೆ. ಆರಂಭದಲ್ಲಿ ಸಹಜ ಸಾವು ಎಂದು ಬಿಂಬಿಸಲಾಗಿದ್ದ ಬಾಲಕಿಯ ನಿಗೂಢ ಸಾವು, ಘಟನೆ ನಡೆದು 3 ತಿಂಗಳ ಬಳಿಕ ಬಂದ ಮರಣೋತ್ತರ ಪರೀಕ್ಷೆ (Post-mortem) ವರದಿಯಿಂದಾಗಿ ಇದೀಗ ಹತ್ಯೆ ಪ್ರಕರಣವಾಗಿ ಮಾರ್ಪಟ್ಟಿದೆ.
ಬೆಂಗಳೂರಿನ ಕಾಡುಗೋಡಿ ಪೊಲೀಸ್ ಠಾಣಾ ವ್ಯಾಪ್ತಿಯ ಸೀಗೆಹಳ್ಳಿ ವಿಲ್ಲಾದಲ್ಲಿ ಈ ದಾರುಣ ಘಟನೆ ನಡೆದಿದ್ದು, ತಾಯಿ ಪ್ರಿಯಾಂಕ ಹಾಗೂ ಆಕೆಯ ಪ್ರಿಯಕರ ಮೋಹನ್ ವಿರುದ್ಧ ಪ್ರಕರಣ ದಾಖಲಾಗಿದೆ.
ಸುಖ ಸಂಸಾರಕ್ಕೆ ‘ವಿಲನ್’ ಆದ ಕಾಲೇಜು ಗೆಳೆಯ!
ದಾವಣಗೆರೆ ಮೂಲದ ಪ್ರವೀಣ್ ಹಾಗೂ ಬೆಂಗಳೂರಿನ ಪ್ರಿಯಾಂಕ ಅವರಿಗೆ 2007ರಲ್ಲಿ ವಿವಾಹವಾಗಿತ್ತು. ಈ ದಂಪತಿಗೆ 17 ವರ್ಷದ ಹಾಗೂ 5 ವರ್ಷದ ಇಬ್ಬರು ಹೆಣ್ಣು ಮಕ್ಕಳಿದ್ದರು. ಇಬ್ಬರು ಮಕ್ಕಳೊಂದಿಗೆ ಸುಖವಾಗಿದ್ದ ಈ ಸಂಸಾರದ ಮಧ್ಯೆ ಪ್ರಿಯಾಂಕಳ ಕಾಲೇಜು ದಿನಗಳ ಹಳೇ ಗೆಳೆಯ ಮೋಹನ್ ಎಂಬಾತ ಎಂಟ್ರಿ ಕೊಟ್ಟಿದ್ದ. ಮೋಹನ್ ಜೊತೆಗಿನ ಪ್ರಿಯಾಂಕಳ ಅಕ್ರಮ ಸಂಬಂಧದ ವಿಷಯ ಪತಿ ಪ್ರವೀಣ್ಗೆ ತಿಳಿಯುತ್ತಿದ್ದಂತೆ ಮನೆಯಲ್ಲಿ ಜಗಳ ಆರಂಭವಾಗಿತ್ತು. ತದನಂತರ ಪತಿಗೆ ವಿಚ್ಛೇದನ (Divorce) ನೀಡಲು ಪಟ್ಟು ಹಿಡಿದಿದ್ದ ಪ್ರಿಯಾಂಕ, ಕಿರಿಯ ಮಗಳು ವೆನ್ನಿಲಾಳನ್ನು ಕರೆದುಕೊಂಡು ಕಾಡುಗೋಡಿಯಲ್ಲಿ ಪ್ರಿಯಕರ ಮೋಹನ್ ಜೊತೆ ವಾಸಿಸಲು ಆರಂಭಿಸಿದ್ದಳು.
ಮಾರ್ಚ್ 24ರಂದು ನಡೆದಿದ್ದೇನು? ತಾಯಿಯ ಕಟ್ಟುಕಥೆ!
ಕಳೆದ ಮಾರ್ಚ್ 24ರಂದು 6 ವರ್ಷದ ಪುಟ್ಟ ಮಗಳು ವೆನ್ನಿಲಾ ಇದ್ದಕ್ಕಿದ್ದಂತೆ ನಿಗೂಢವಾಗಿ ಮೃತಪಟ್ಟಿದ್ದಾಳೆ. ಈ ಬಗ್ಗೆ ಪತಿ ಪ್ರವೀಣ್ ಪ್ರಶ್ನಿಸಿದಾಗ ಪ್ರಿಯಾಂಕ ಅನುಮಾನಾಸ್ಪದ ಕಥೆಗಳನ್ನು ಹೆಣೆದಿದ್ದಳು. “ಮಗುವಿಗೆ ಬಿರಿಯಾನಿ ಮತ್ತು ಐಸ್ಕ್ರೀಮ್ ಕೊಡಿಸಿದ್ದೆ. ಬಳಿಕ ಕಾರಿನಲ್ಲಿ ಎಸಿ ಹಾಕಿ ಮಲಗಿಸಿದ್ದೆ. ರಾತ್ರಿ ಮನೆಗೆ ಹೋದಾಗ ಮಗು ಚೆನ್ನಾಗಿಯೇ ಇತ್ತು, ಆದರೆ ಬೆಳಗ್ಗೆ ನೋಡುವಷ್ಟರಲ್ಲಿ ಮೃತಪಟ್ಟಿತ್ತು” ಎಂದು ನಂಬಿಸಲು ಯತ್ನಿಸಿದ್ದಾಳೆ.
ಟ್ವಿಸ್ಟ್ ಕೊಟ್ಟ ಪೋಸ್ಟ್ಮಾರ್ಟಂ ರಿಪೋರ್ಟ್: ವಿದೇಶಿ ವೈದ್ಯೆಯ ಜಾಗರೂಕತೆ!
ಏಪ್ರಿಲ್ 4ರಂದು ಮಗುವಿನ ಮರಣೋತ್ತರ ಪರೀಕ್ಷೆಯ ವರದಿ ಪ್ರವೀಣ್ ಕೈ ಸೇರಿತ್ತು. ಈ ವರದಿಯನ್ನು ಅವರು ವಿದೇಶದಲ್ಲಿ ವೈದ್ಯೆಯಾಗಿ ಕಾರ್ಯನಿರ್ವಹಿಸುತ್ತಿರುವ ತಮ್ಮ ಸಂಬಂಧಿಯೊಬ್ಬರಿಗೆ ಕಳುಹಿಸಿ ಪರಿಶೀಲಿಸುವಂತೆ ಕೋರಿದ್ದರು. ವರದಿಯನ್ನು ಕೂಲಂಕಷವಾಗಿ ನೋಡಿದ ಆ ವೈದ್ಯೆ, “ಇದು ಯಾವುದೇ ಕಾರಣಕ್ಕೂ ಸಹಜ ಸಾವಲ್ಲ, ಮಗುವಿನ ದೇಹದಲ್ಲಿ ಗಂಭೀರ ಹಲ್ಲೆಯ ಲಕ್ಷಣಗಳಿವೆ, ಇಲ್ಲಿ ಏನೋ ದೊಡ್ಡದಾಗಿ ತಪ್ಪಾಗಿದೆ” ಎಂದು ಎಚ್ಚರಿಸಿದ್ದಾರೆ. ಇದರಿಂದ ಪ್ರವೀಣ್ ಅವರ ಅನುಮಾನ ಬಲವಾಗಿದೆ.
ಹೊಟ್ಟೆಗೆ ಒದ್ದು, ಉಸಿರುಗಟ್ಟಿಸಿ ಹತ್ಯೆ?
ವೈದ್ಯರ ಅಭಿಪ್ರಾಯದ ಬೆನ್ನಲ್ಲೇ ಮಗುವಿನ ದೇಹದ ಮೇಲಿನ ಗಾಯಗಳು, ಹೊಟ್ಟೆಗೆ ಬಲವಾಗಿ ಒದ್ದಿರುವುದು ಹಾಗೂ ಉಸಿರುಗಟ್ಟಿಸಿ ಕೊಲೆ ಮಾಡಿರುವ ಸಾಧ್ಯತೆಗಳನ್ನು ಶಂಕಿಸಿ ತಂದೆ ಪ್ರವೀಣ್ ಕಾಡುಗೋಡಿ ಪೊಲೀಸರಿಗೆ ಅಧಿಕೃತ ದೂರು ನೀಡಿದ್ದಾರೆ. ಅಕ್ರಮ ಸಂಬಂಧಕ್ಕೆ ಹಾಗೂ ಮಗುವಿನ ಮೈಬಣ್ಣದ ಕಾರಣಕ್ಕೆ ಮಗಳನ್ನು ಕೊಲೆ ಮಾಡಲಾಗಿದೆ ಎಂದು ತಂದೆ ಗಂಭೀರವಾಗಿ ಆರೋಪಿಸಿದ್ದಾರೆ.
ಪ್ರಿಯಕರ ಪೊಲೀಸ್ ವಶಕ್ಕೆ: ತಾಯಿ ನಾಪತ್ತೆ!
ಪ್ರವೀಣ್ ನೀಡಿದ ದೂರಿನನ್ವಯ ಕಾಡುಗೋಡಿ ಪೊಲೀಸರು ತಾಯಿ ಪ್ರಿಯಾಂಕ ಮತ್ತು ಪ್ರಿಯಕರ ಮೋಹನ್ ವಿರುದ್ಧ ಕೊಲೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಸದ್ಯ ಆರೋಪಿ ಪ್ರಿಯಕರ ಮೋಹನ್ನನ್ನು ಪೊಲೀಸರು ವಶಕ್ಕೆ ಪಡೆದು ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ. ಆದರೆ, ಹೆತ್ತ ಮಗಳನ್ನೇ ಬಲಿಪಡೆದ ಆರೋಪ ಎದುರಿಸುತ್ತಿರುವ ತಾಯಿ ಪ್ರಿಯಾಂಕ ಸದ್ಯ ತಲೆಮರೆಸಿಕೊಂಡಿದ್ದು, ಆಕೆಗಾಗಿ ಪೊಲೀಸರು ಜಾಲ ಬೀಸಿದ್ದಾರೆ.
ಮಗುವಿನ ಸಾವಿನ ನಿಖರ ಕಾರಣವನ್ನು ಸಂಪೂರ್ಣವಾಗಿ ಧೃಡಪಡಿಸಿಕೊಳ್ಳಲು ಪೊಲೀಸರು ಇದೀಗ ಎಫ್ಎಸ್ಎಲ್ (FSL – Forensic Science Laboratory) ವರದಿಗಾಗಿ ಕಾಯುತ್ತಿದ್ದು, ವರದಿ ಬಂದ ಬಳಿಕ ಪ್ರಕರಣದ ಸಂಪೂರ್ಣ ಸತ್ಯಾಸತ್ಯತೆ ಹೊರಬರಲಿದೆ.
