ಕಾಕಿನಾಡ (ಆಂಧ್ರಪ್ರದೇಶ): ಮದುವೆಯ ಪವಿತ್ರ ಬಂಧನಕ್ಕೆ ಸಾಕ್ಷಿಯಾಗಿದ್ದ ಮಾಂಗಲ್ಯ ಸರವನ್ನು ಕ್ಷಣಿಕ ಸುಖದ ವ್ಯಾಮೋಹಕ್ಕಾಗಿ ಪತ್ನಿಯೊಬ್ಬಳು ನಡುರಸ್ತೆಯಲ್ಲೇ ಹರಿದುಹಾಕಿದಾಳೆ. ತನಗೇನೋ ಕಾಯಿಲೆ ಇದೆ ಎನ್ನುವ ಕನಿಷ್ಠ ಜಾಲಿಯೂ ಇಲ್ಲದೆ, ಕಟ್ಟುನಿಟ್ಟಿನ ಗಂಡನನ್ನೇ ಬರ್ಬರವಾಗಿ ಹತ್ಯೆ ಮಾಡಿದ್ದಾಳೆ. ಅಷ್ಟೇ ಅಲ್ಲ, ಇದು ಹಾರ್ಟ್ ಅಟ್ಯಾಕ್ ಸಾವು ಎಂದು ಬಿಂಬಿಸಿ ನಾಟಕವಾಡಿದ್ದಾಳೆ. ಆದರೆ, ಮೂರೇ ತಿಂಗಳಲ್ಲಿ ಪ್ರಿಯಕರನ ಎಂಟ್ರಿಯಿಂದಾಗಿ ಈ ಕಿರಾತಕಿಯ ಪಾಪದ ಕೊಡ ತುಂಬಿ ಬಂದಿದ್ದು, ಸದ್ಯ ಕಂಬಿ ಎಣಿಸುವಂತಾಗಿದೆ.
ಏನಿದು ಭೀಕರ ಘಟನೆ?
ಆಂಧ್ರಪ್ರದೇಶದ ಕಾಕಿನಾಡದ ಸಮೀಪದ ಸತ್ಪವರಂನಲ್ಲಿ ಈ ಘಟನೆ ನಡೆದಿದೆ. ಆಟೋ ಚಾಲಕನಾಗಿದ್ದ ಪುಲ್ಲಾ ದುರ್ಗಾಪ್ರಸಾದ್ (35) ಎಂಬಾತನಿಗೆ ರಮಾದೇವಿ ಎಂಬ ಪತ್ನಿ ಹಾಗೂ ಇಬ್ಬರು ಹೆಣ್ಣು ಮಕ್ಕಳಿದ್ದರು. ಸುಮಾರು ಎರಡು ವರ್ಷಗಳ ಹಿಂದೆ ದುರ್ಗಾಪ್ರಸಾದ್ಗೆ ಹೃದಯಸಂಬಂಧಿ ಕಾಯಿಲೆ ಕಾಣಿಸಿಕೊಂಡು ಸ್ಟಂಟ್ ಅಳವಡಿಸಲಾಗಿತ್ತು. ಇದರಿಂದಾಗಿ ಆತ ಮನೆಯಲ್ಲೇ ಉಳಿಯುವಂತಾಗಿತ್ತು. ದಿನದಿಂದ ದಿನಕ್ಕೆ ಗಂಡ ಅಶಕ್ತನಾಗುತ್ತಿರುವುದನ್ನು ಕಂಡು, ಪತ್ನಿ ರಮಾದೇವಿ ವಿಕೃತ ದಾರಿ ಹಿಡಿದಿದ್ದಾಳೆ.
ಇನ್ಸ್ಟಾಗ್ರಾಮ್ ಪರಿಚಯ.. ಅನೈತಿಕ ಸಂಬಂಧ!
ಇದೇ ವೇಳೆ ರಮಾದೇವಿಗೆ ಇನ್ಸ್ಟಾಗ್ರಾಮ್ (#Instagram) ಮೂಲಕ ಬಾಪಟ್ಲಾ ಮೂಲದ ಗೋಪಿಸಾಯಿ ಎಂಬ ಯುವಕನ ಪರಿಚಯವಾಗಿದೆ. ಈ ಪರಿಚಯ ದಿನಕಳೆದಂತೆ ಅನೈತಿಕ ಸಂಬಂಧಕ್ಕೆ ತಿರುಗಿದೆ. ಪ್ರಿಯಕರ ಗೋಪಿಸಾಯಿ ಆಗಾಗ ಇಲ್ಲಿಗೆ ಬಂದು ರಮಾದೇವಿಯನ್ನು ವಿಜಯವಾಡ ಸೇರಿದಂತೆ ಹಲವು ಪ್ರೇಕ್ಷಣೀಯ ಸ್ಥಳಗಳಿಗೆ ಸುತ್ತಾಡಿಸಲು ಕರೆದುಕೊಂಡು ಹೋಗುತ್ತಿದ್ದ. ಹೆಂಡತಿಯ ಈ ವರ್ತನೆಯಿಂದ ಅನುಮಾನಗೊಂಡ ದುರ್ಗಾಪ್ರಸಾದ್, ಆಕೆಯನ್ನು ತರಾಟೆಗೆ ತೆಗೆದುಕೊಂಡು ಬುದ್ಧಿ ಮಾತು ಹೇಳಿದ್ದ.
ಖರ್ಜೂರ ಜ್ಯೂಸ್ನಲ್ಲಿ ನಿದ್ದೆ ಮಾತ್ರೆ.. ದಿಂಬಿನಿಂದ ಉಸಿರುಗಟ್ಟಿಸಿ ಕೊಲೆ!
ತಮ್ಮ ಸುಖದ ಆಟಕ್ಕೆ ಅಡ್ಡಿಯಾಗಿದ್ದ ಗಂಡನನ್ನು ಮುಗಿಸಲು ರಮಾದೇವಿ ಮತ್ತು ಪ್ರಿಯಕರ ಗೋಪಿಸಾಯಿ ಭೀಕರ ಸ್ಕೆಚ್ ಹಾಕಿದ್ದಾರೆ. ಗೋಪಿಸಾಯಿ ಬಾಪಟ್ಲಾದಿಂದ 15 ನಿದ್ದೆ ಮಾತ್ರೆಗಳನ್ನು ತಂದು ಕೊಟ್ಟಿದ್ದಾನೆ. ಮಾರ್ಚ್ 13ರ ಬೆಳಗ್ಗೆ ರಮಾದೇವಿ ತನ್ನ ಗಂಡನಿಗೆ ಖರ್ಜೂರ ಜ್ಯೂಸ್ನಲ್ಲಿ ಆ ಮಾತ್ರೆಗಳನ್ನು ಬೆರೆಸಿ ಕುಡಿಸಿದ್ದಾಳೆ.
ಹತ್ಯೆಯ ಭೀಕರ ರೂಪ: ಮಾತ್ರೆ ಪ್ರಭಾವದಿಂದ ದುರ್ಗಾಪ್ರಸಾದ್ ಪ್ರಜ್ಞೆ ಕಳೆದುಕೊಳ್ಳುತ್ತಿದ್ದಂತೆ, ರಮಾದೇವಿ ಆತನ ಮುಖದ ಮೇಲೆ ದಿಂಬನ್ನು ಇಟ್ಟು ಗಟ್ಟಿಯಾಗಿ ಒತ್ತಿ, ಉಸಿರುಗಟ್ಟಿಸಿ ಕೊಲೆ ಮಾಡಿದ್ದಾಳೆ. ಬಳಿಕ ಏನೂ ತಿಳಿಯದವಳಂತೆ ಗಂಡನಿಗೆ ಹಾರ್ಟ್ ಅಟ್ಯಾಕ್ ಆಗಿದೆ ಎಂದು ಎಲ್ಲರನ್ನೂ ನಂಬಿಸಿ, ಶವ ಸಂಸ್ಕಾರವನ್ನೂ ಮುಗಿಸಿಬಿಟ್ಟಿದ್ದಾಳೆ!
ಪ್ರಿಯಕರನಿಂದಲೇ ಟ್ವಿಸ್ಟ್: ಹತ್ಯೆಯ ರಹಸ್ಯ ಬಯಲಾಗಿದ್ದು ಹೇಗೆ?
ಟ್ವಿಸ್ಟ್ ಅಂದ್ರೆ, ಗಂಡ ಸತ್ತು ಇನ್ನೂ ಮೂರು ತಿಂಗಳು ಕಳೆಯುವ ಮುನ್ನವೇ ರಮಾದೇವಿ ತನ್ನ ಹಳೇ ಪ್ರಿಯಕರ ಗೋಪಿಸಾಯಿಯನ್ನು ಕೈಬಿಟ್ಟು, ಮತ್ತೊಬ್ಬ ಹೊಸ ಪ್ರಿಯಕರನ ಹಿಂದೆ ಬಿದ್ದಿದ್ದಾಳೆ! ಇದರಿಂದ ರೊಚ್ಚಿಗೆದ್ದ ಹಳೇ ಪ್ರಿಯಕರ ಗೋಪಿಸಾಯಿ, ರಮಾದೇವಿಯ ಮಗಳ ಮೊಬೈಲ್ಗೆ ಶಾಕಿಂಗ್ ಸಂದೇಶವೊಂದನ್ನು ರವಾನಿಸಿದ್ದಾನೆ.
ಆ ಒಂದು ಮೆಸೇಜ್: “ನಿಮ್ಮ ಅಮ್ಮ ಜ್ಯೂಸ್ನಲ್ಲಿ ನಿದ್ದೆ ಮಾತ್ರೆಗಳನ್ನು ಬೆರೆಸಿ ಕೊಟ್ಟು, ಮುಖಕ್ಕೆ ದಿಂಬು ಒತ್ತಿ ನಿಮ್ಮ ಅಪ್ಪನನ್ನು ಕೊಲೆ ಮಾಡಿದ್ದಾಳೆ” ಎಂದು ಗೋಪಿಸಾಯಿ ಮೆಸೇಜ್ ಮಾಡಿದ್ದಾನೆ. ಇದರಿಂದ ಬೆಚ್ಚಿಬಿದ್ದ ಮಗಳು ತಕ್ಷಣ ಪೊಲೀಸರಿಗೆ ದೂರು ನೀಡಿದ್ದು, ಸದ್ಯ ಪೊಲೀಸರು ರಮಾದೇವಿ ಮತ್ತು ಆಕೆಯ ಪ್ರಿಯಕರನನ್ನು ಬಂಧಿಸಿದ್ದಾರೆ.
ನಿಮ್ಮ ಅನಿಸಿಕೆ ಏನು?: ಇನ್ಸ್ಟಾಗ್ರಾಮ್ ಮತ್ತು ಸಾಮಾಜಿಕ ಜಾಲತಾಣಗಳ ಅತಿಯಾದ ವ್ಯಾಮೋಹ ಇಂತಹ ಘೋರ ಕೃತ್ಯಗಳಿಗೆ ಕಾರಣವಾಗುತ್ತಿದೆಯೇ? ಕಾನೂನು ಇಂತಹ ಆರೋಪಿಗಳಿಗೆ ಎಂತಹ ಶಿಕ್ಷೆ ನೀಡಬೇಕು? ಕಮೆಂಟ್ ಮಾಡಿ ತಿಳಿಸಿ.
