ಕರ್ನಾಟಕದಿಂದ ಎಚ್ಎಎಲ್ ಘಟಕವನ್ನು ಆಂಧ್ರಪ್ರದೇಶಕ್ಕೆ ಸ್ಥಳಾಂತರ ಮಾಡುವಂತೆ ಆಂಧ್ರ ಸಿಎಂ ರಕ್ಷಣಾ ಸಚಿವ ರಾಜನಾಥ್ ಸಿಂಗ್‌ಗೆ ಮನವಿ ಮಾಡಿಕೊಂಡ ಬೆನ್ನಲ್ಲಿಯೇ ರಾಜ್ಯ ರಾಜಕಾರಣಿಗಳು ಇದಕ್ಕೆ ವಿರೋಧ ವ್ಯಕ್ತಪಡಿಸಲು ಆರಂಭಿಸಿದ್ದಾರೆ. ಈ ನಡುವೆ ಡಿಸಿಎಂ ಡಿಕೆ ಶಿವಕುಮಾರ್ ಯಾವುದೇ ಕಾರಣಕ್ಕೂ ನಾವು ಎಚ್‌ಎಎಲ್‌ಅನ್ನು ಬಿಟ್ಟುಕೊಡೋದಿಲ್ಲ. ಇದನ್ನು ಬಿಜೆಪಿ ಸರ್ಕಾರ ನೀಡಿದ್ದಲ್ಲ. ಮಾಜಿ ಪ್ರಧಾನಿ ಜವಹರಲಾಲ್‌ ನೆಹರು ಅವರು ನಾಡಿನ ಸಾಮರ್ಥ್ಯ ಗುರುತಿಸಿ ಬೆಂಗಳೂರಿನಲ್ಲಿ ಎಚ್ಎಎಲ್ ಘಟಕ ಸ್ಥಾಪಿಸಿದ್ದರು’ ಎಂದಿದ್ದರು.
ಆದರೆ, ಡಿಸಿಎಂ ಡಿಕೆ ಶಿವಕುಮಾರ್ ಅವರ ಮಾತು ಎಲ್ಲರಿಗೂ ಇಷ್ಟವಾಗಿಲ್ಲ. ಮೈಸೂರು ಮಹಾರಾಜ ಹಾಗೂ ಮೈಸೂರು-ಕೊಡಗು ಸಂಸದ ಯದುವೀರ್ ಒಡೆಯರ್ ಸೂಕ್ತ ಮಾಹಿತಿಗಳೊಂದಿಗೆ ಡಿಸಿಎಂಗೆ ತಿರುಗೇಟು ನೀಡಿದ್ದಾರೆ. ಒಟ್ಟು 18 ಟ್ವೀಟ್‌ಗಳ ಥ್ರೆಡ್‌ನಲ್ಲಿ ಇದರ ವಿವರ ನೀಡಿದ್ದಾರೆ.
ನೆಹರುಗೂ ಎಚ್‌ಎಎಲ್‌ಗೂ ಸಂಬಂಧವೇ ಇಲ್ಲ ಎಂದ ಯದುವೀರ್
ಕರ್ನಾಟಕದ ಉಪಮುಖ್ಯಮಂತ್ರಿ ಶ್ರೀ ಡಿ.ಕೆ. ಶಿವಕುಮಾರ್ ಅವರು ನೆಹರೂ HAL ಅನ್ನು ಸ್ಥಾಪಿಸಿದರು ಎಂದು ನೀಡಿದ ಹೇಳಿಕೆ ಸತ್ಯಕ್ಕೆ ದೂರವಾಗಿದೆ. ನೆಹರೂ ಅವರಿಗೂ ಎಚ್ಎಎಲ್ ಸ್ಥಾಪನೆಗೆ ಯಾವುದೇ ಸಂಬಂಧವಿರಲಿಲ್ಲ. ಯಾಕೆಂದರೆ, ಎಚ್‌ಎಎಲ್‌ನ ಸತ್ಯಗಳು ಹೀಗಿವೆ ಎಂದು ಬರೆದುಕೊಂಡಿದ್ದಾರೆ.
ಇಂಟರ್-ಕಾಂಟಿನೆಂಟ್ ಕಾರ್ಪ್‌ನ ಅಧ್ಯಕ್ಷರಾದ ವಿಲಿಯಂ ಡಿ. ಪಾವ್ಲಿ, 1933 ರಲ್ಲಿ ಚೀನಾದ ರಾಷ್ಟ್ರೀಯತಾವಾದಿ ಸರ್ಕಾರದೊಂದಿಗೆ ಪಾಲುದಾರಿಕೆ ಮಾಡಿಕೊಂಡು CAMCO ಅನ್ನು ಪ್ರಾರಂಭಿಸಿದರು. ಹಾಕ್ 75 ಮತ್ತು CW-21 ಯುದ್ಧವಿಮಾನಗಳನ್ನು ಜೋಡಿಸುವ ಉದ್ಯಮ ಆರಂಭಿಸಿದರು.. ನಂತರ ಅವರು ಭಾರತದ ವಿಮಾನ ಉದ್ಯಮವನ್ನು ಪ್ರಾರಂಭಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದರು.
ಒಪ್ಪಿಗೆ ನೀಡಿದ್ದು ಮೈಸೂರು ಮಹಾರಾಜರು ಮಾತ್ರ
ಅಕ್ಟೋಬರ್ 1939 ರಲ್ಲಿ, ಪಾವ್ಲಿ ಭಾರತೀಯ ಕೈಗಾರಿಕೋದ್ಯಮಿ ವಾಲ್ಚಂದ್ ಹಿರಾಚಂದ್ ಅವರನ್ನು ಹಾಂಗ್ ಕಾಂಗ್‌ಗೆ ಪ್ಯಾನ್ ಆಮ್ ಕ್ಲಿಪ್ಪರ್ ವಿಮಾನದಲ್ಲಿ ಭೇಟಿಯಾದರು. ಆ ಆಕಸ್ಮಿಕ ಭೇಟಿಯು ಒಂದು ದಿಟ್ಟ ಕಲ್ಪನೆಗೆ ಕಾರಣವಾಯಿತು ಅದೇನೆಂದರೆ, ಭಾರತದಲ್ಲಿ ವಿಮಾನಗಳನ್ನು ತಯಾರಿಸುವುದು.
ಪಾವ್ಲಿ ಜುಲೈ 1940 ರಲ್ಲಿ ಭಾರತಕ್ಕೆ ಭೇಟಿ ನೀಡಿದರು ಮತ್ತು ಕೇವಲ 72 ಗಂಟೆಗಳಲ್ಲಿ ಯೋಜನೆಗೆ ಬ್ರಿಟಿಷ್ ಅನುಮೋದನೆಯನ್ನು ಪಡೆದರು. ಆದರೆ ವಾಲ್ಚಂದ್ ದಿ ಸಿಂಧಿಯಾ ಸ್ಟೀಮ್ ನ್ಯಾವಿಗೇಷನ್ ಕಂಪನಿಯ ಷೇರುದಾರರಿಗೆ ಈ ಕಲ್ಪನೆಯನ್ನು ಪ್ರಸ್ತಾಪಿಸಿದಾಗ, ಅವರು ಅದನ್ನು ತಿರಸ್ಕರಿಸಿದರು. ವಾಲ್ಚಂದ್ ಬೆಂಬಲಕ್ಕಾಗಿ ಭಾರತೀಯ ರಾಜಪ್ರಭುತ್ವದ ರಾಜ್ಯಗಳಾದ ಬರೋಡಾ, ಗ್ವಾಲಿಯರ್, ಭಾವನಗರ ಮತ್ತು ಮೈಸೂರುಗಳನ್ನು ತಲುಪಿದರು. ಮೈಸೂರಿನ ಮಹಾರಾಜ ಇದಕ್ಕೆ ಒಪ್ಪಿದರು.
ಅಕ್ಟೋಬರ್ 1940 ರಲ್ಲಿ, ವಾಲ್ಚಂದ್ ಮತ್ತು ಪಾವ್ಲಿ ಬೆಂಗಳೂರಿಗೆ ಬಂದರು. ಮೈಸೂರು ಸರ್ಕಾರವು 700 ಎಕರೆಗಳನ್ನು ಉಚಿತವಾಗಿ ನೀಡಿತು. ₹25 ಲಕ್ಷಗಳನ್ನು ಷೇರುಗಳಲ್ಲಿ ಹೂಡಿಕೆ ಮಾಡಿತು ಮತ್ತು ಈ ಉದ್ಯಮಕ್ಕೆ ಬೆಂಬಲ ನೀಡಿತು. ಪಾವ್ಲಿ ಈ ಸ್ಥಳವನ್ನು ವೈಯಕ್ತಿಕವಾಗಿ ಆಯ್ಕೆ ಮಾಡಿದ್ದರು. ಡಿಸೆಂಬರ್ 23, 1940 ರಂದು, ಹಿಂದೂಸ್ತಾನ್ ಏರ್‌ಕ್ರಾಫ್ಟ್ ಕಂಪನಿಯನ್ನು ಮೈಸೂರು ಕಂಪನಿಗಳ ಕಾಯ್ದೆಯಡಿಯಲ್ಲಿ ಸಂಯೋಜಿಸಲಾಯಿತು. ವಾಲ್ಚಂದ್ ಇದಕ್ಕೆ ಅಧ್ಯಕ್ಷರಾಗಿದ್ದರು. ಬೆಂಗಳೂರಿನ ದೊಮ್ಮಲೂರು ರಸ್ತೆಯಲ್ಲಿರುವ ಈವೆಂಟೈಡ್‌ನಲ್ಲಿ ಕಚೇರಿ ತೆರೆಯಲಾಯಿತು.
ಡಿಸೆಂಬರ್ 24, 1940 ರಂದು ಎಚ್ಎಎಲ್ ಕೆಲಸ ಪ್ರಾರಂಭವಾಯಿತು. ಜನವರಿ 1941 ರ ಮಧ್ಯಭಾಗದಲ್ಲಿ, ಮೊದಲ ಕಟ್ಟಡ ಮತ್ತು ರನ್‌ವೇ ಸಿದ್ಧವಾಯಿತು. ಇದು ಕೇವಲ ಮೂರು ವಾರಗಳಲ್ಲಿ ಅನ್ನೋದೇ ದೊಡ್ಡ ಸಾಧನೆ.
ಕಂಪನಿಯ ಮೊದಲ ಆರ್ಡರ್
ಭಾರತ ಸರ್ಕಾರದಿಂದ ಕಂಪನಿಗೆ ಬಂದ ಮೊದಲ ಆರ್ಡರ್, 74 ವಲ್ಟೀ ಅಟ್ಯಾಕ್ ಬಾಂಬರ್‌ಗಳು, 30 ಹಾರ್ಲೋ ಪಿಸಿ5 ಟ್ರೇನರ್ಸ್‌ ಮತ್ತು 48 ಕರ್ಟಿಸ್ ಹಾಕ್ ಫೈಟರ್‌ಗಳು. ಇದು 1942ರ ಒಳಗಾಗಿ ಪೂರ್ಣಗೊಳ್ಳಬೇಕಿತ್ತು. ಏಪ್ರಿಲ್ 1941 ರಲ್ಲಿ, ಬ್ರಿಟಿಷ್ ಭಾರತೀಯ ಸರ್ಕಾರವು ಹಿಂದೂಸ್ತಾನ್ ವಿಮಾನದಲ್ಲಿ ₹25 ಲಕ್ಷ ಹೂಡಿಕೆ ಮಾಡಿತು. ಈ ನಡುವೆ ಚೀನಾದಲ್ಲಿ ಜಪಾನಿನ ಬೆದರಿಕೆಯಿಂದಾಗಿ ಯಂತ್ರೋಪಕರಣಗಳನ್ನು CAMCO ನಿಂದ ಮೈಸೂರಿಗೆ ಸ್ಥಳಾಂತರಿಸಬೇಕಾಯಿತು.
ಆಗಸ್ಟ್ 29, 1941ರಲ್ಲಿ ಕಂಪನಿಯು ತನ್ನ ಮೊದಲ ಹಾರ್ಲೋ ಟ್ರೇನರ್‌ಅನ್ನು ಭಾರತ ಸರ್ಕಾರಕ್ಕೆ ಹಸ್ತಾಂತರಿಸಿತು. ಭಾರತದ ವಾಯುಯಾನ ಕನಸುಗಳು ನನಸಾಗಲು ಆರಂಭಿಸಿದ್ದವು.
ಪರ್ಲ್ ಹಾರ್ಬರ್ (ಡಿಸೆಂಬರ್ 1941) ಮತ್ತು ಮಲಯದಲ್ಲಿ ಬ್ರಿಟಿಷ್ ಹಡಗುಗಳ ನಷ್ಟದ ನಂತರ, ಜಪಾನಿನ ಆಕ್ರಮಣದ ಭಯವು ಬ್ರಿಟಿಷರು ಏಪ್ರಿಲ್ 1942 ರಲ್ಲಿ ವಾಲ್ಚಂದ್ ಅವರ ಷೇರುಗಳನ್ನು ಖರೀದಿಸಲು ಕಾರಣವಾಯಿತು. ಆದರೆ, ಮೈಸೂರು ಸರ್ಕಾರ ತನ್ನ ಪಾಲನ್ನು ಮಾರಾಟ ಮಾಡಲು ನಿರಾಕರಿಸಿತು. ಯುದ್ಧದ ಅವಧಿಗೆ ಬ್ರಿಟಿಷರಿಗೆ ನಿಯಂತ್ರಣವನ್ನು ಹಸ್ತಾಂತರಿಸಿತು. ವಾಲ್ಚಂದ್ ಆರಂಭಿಕ ₹25 ಲಕ್ಷ ಹೂಡಿಕೆಯಿಂದ ₹57 ಲಕ್ಷ ಲಾಭ ಗಳಿಸಿದ್ದರು.
1943 ರಲ್ಲಿ, ಯುಎಸ್ ಆರ್ಮಿ ಏರ್ ಫೋರ್ಸ್ ಕಾರ್ಖಾನೆಯನ್ನು ವಹಿಸಿಕೊಂಡಿತು, ಹಿಂದೂಸ್ತಾನ್ ಏರ್‌ಕ್ರಾಫ್ಟ್ ನಿರ್ವಹಣೆಯನ್ನು ಉಳಿಸಿಕೊಂಡಿತು. ಇದು 84 ನೇ ಏರ್ ಡಿಪೋ ಎನಿಸಿಕೊಂಡಿತ್ತು. ಮಿತ್ರರಾಷ್ಟ್ರಗಳ ವಿಮಾನಗಳನ್ನು ದುರಸ್ತಿ ಮಾಡುವ ಕೇಂದ್ರವಾಗಿತ್ತು.
ಕಾರ್ಖಾನೆಯು ಪಿಬಿವೈ ಕ್ಯಾಟಲಿನಾಸ್‌ನಿಂದ ಭಾರತ ಮತ್ತು ಬರ್ಮಾದಲ್ಲಿ ಹಾರಾಟ ನಡೆಸುವ ಎಲ್ಲಾ ರೀತಿಯ ವಿಮಾನಗಳನ್ನು ಕೂಲಂಕಷವಾಗಿ ಪರಿಶೀಲಿಸಿತು. ಯುದ್ಧದ ಅಂತ್ಯದ ವೇಳೆಗೆ, ಇದು ಏಷ್ಯಾದ ಅತಿದೊಡ್ಡ ಓವರ್‌ಹಾಲ್‌ ಸೌಲಭ್ಯಗಳಲ್ಲಿ ಒಂದಾಗಿತ್ತು. ಯುದ್ಧದ ಸಮಯದಲ್ಲಿ, ಸರ್ಕಾರವು ಮೈಸೂರಿಗೆ ತನ್ನ ಆಸಕ್ತಿಯನ್ನು ಮುಗಿಸಲು ₹12.11 ಲಕ್ಷಗಳ ಪರಿಹಾರವನ್ನು ನೀಡಿತು. ಏಪ್ರಿಲ್ 1946 ರಲ್ಲಿ ಮೈಸೂರು ಮತ್ತೆ ಸಕ್ರಿಯ ಪಾಲುದಾರ ಎನಿಸಿಕೊಂಡಿತು.
ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್
ಅಕ್ಟೋಬರ್ 1, 1964 ರಂದು, ಕಾರ್ಖಾನೆಯನ್ನು ರಕ್ಷಣಾ ಸಚಿವಾಲಯದ ಅಡಿಯಲ್ಲಿ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (HAL) ಎಂದು ಪುನರ್ರಚಿಸಲಾಯಿತು. ಆ ಪರಂಪರೆ ಈಗಲೂ ಮುಂದುವರೆದಿದೆ. ಮೈಸೂರಿನ ಪ್ರಮುಖ ಪಾತ್ರದ ಹೊರತಾಗಿಯೂ, HAL ಮತ್ತು ಕರ್ನಾಟಕ ಸರ್ಕಾರವು ಈ ಸಂಸ್ಥೆಯ ಸ್ಥಾಪನೆಯಲ್ಲಿ ಮಹಾರಾಜರ ಪಾತ್ರವನ್ನು ಅಷ್ಟೇನೂ ಒಪ್ಪಿಕೊಳ್ಳುವುದಿಲ್ಲ. ಇದರ ವೆಬ್‌ಸೈಟ್ ವಾಲ್ಚಂದ್ ಅವರ ಫೋಟೋವನ್ನು ಮಾತ್ರ ಒಳಗೊಂಡಿದೆ. ಭಾರತೀಯ ವಾಯುಯಾನಕ್ಕೆ ರಾಜಮನೆತನದ ಕೊಡುಗೆಯೇ ಮರೆತುಹೋಗಿದೆ.
ವಾಸ್ತವಗಳನ್ನು ತಪ್ಪಾಗಿ ಪ್ರತಿನಿಧಿಸುವ ಮತ್ತು ನೆಹರು/ಗಾಂಧಿ ಕುಟುಂಬವನ್ನು, ವಿಶೇಷವಾಗಿ ಸುಳ್ಳು ಹೇಳಿಕೆಗಳೊಂದಿಗೆ ವೈಭವೀಕರಿಸುವ ಬದಲು, ಸರ್ಕಾರ ಮತ್ತು ಉಪಮುಖ್ಯಮಂತ್ರಿಗಳು H.A.L ಅನ್ನು ಬಲಪಡಿಸಲಾಗಿದೆ ಮತ್ತು ಅದರ ವಲಯದಲ್ಲಿ ಮುಂಚೂಣಿಯಲ್ಲಿರಲು ಅಗತ್ಯವಿರುವ ಕ್ರಮಗಳನ್ನು ಕೈಗೊಳ್ಳಬೇಕು. ಈ ಸಂಸ್ಥೆಯನ್ನು ಕರ್ನಾಟಕದ ನಾಯಕರು ನಿರ್ಮಿಸಿದ್ದಾರೆ ಮತ್ತು ಭಾರತದ ಪ್ರಗತಿಗೆ ರಾಜ್ಯದ ಕೊಡುಗೆಯ ಸಂಕೇತವಾಗಿ ಉಳಿದಿದೆ ಎಂದು ತಿಳಿದುಕೊಳ್ಳಲು ಅವರು ಹೆಮ್ಮೆಪಡಬೇಕು ಎಂದು ಬರೆದುಕೊಂಡಿದ್ದಾರೆ.
