ಇಂದಿನ ಜೀವನಶೈಲಿಯಲ್ಲಿ ಗಂಟೆಗಟ್ಟಲೆ ಕುಳಿತು ಕೆಲಸ ಮಾಡುವವರ ಸಂಖ್ಯೆ ಹೆಚ್ಚುತ್ತಿದೆ. ದೀರ್ಘಕಾಲ ನಿರಂತರವಾಗಿ ಕುಳಿತುಕೊಳ್ಳುವುದರಿಂದ ಬೊಜ್ಜು, ಮಧುಮೇಹ, ಹೃದಯ ಸಂಬಂಧಿ ಕಾಯಿಲೆಗಳಷ್ಟೇ ಅಲ್ಲದೆ, ಕ್ಯಾನ್ಸರ್’ನಿಂದ ಸಾವಿನ ಅಪಾಯವೂ ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಹೊಸ ಅಧ್ಯಯನವೊಂದು ತಿಳಿಸಿದೆ.
ಇಂದಿನ ಜೀವನಶೈಲಿಯಲ್ಲಿ ಕಂಪ್ಯೂಟರ್ ಮುಂದೆ ಅಥವಾ ಕಚೇರಿಯಲ್ಲಿ ಗಂಟೆಗಟ್ಟಲೆ ಒಂದೇ ಸ್ಥಳದಲ್ಲಿ ಕುಳಿತು ಕೆಲಸ ಮಾಡುವವರ ಸಂಖ್ಯೆ ಹೆಚ್ಚುತ್ತಿದೆ. ಆದರೆ 30 ನಿಮಿಷಕ್ಕಿಂತ ಹೆಚ್ಚು ಕಾಲ ಎದ್ದೇಳದೆ ನಿರಂತರವಾಗಿ ಕುಳಿತುಕೊಳ್ಳುವುದು ಕ್ಯಾನ್ಸರ್ನಿಂದ ಸಾವಿನ ಅಪಾಯವನ್ನು ಹೆಚ್ಚಿಸಬಹುದು ಎಂದು ಬ್ರಿಟನ್ನ ಯೂನಿವರ್ಸಿಟಿ ಆಫ್ ಗ್ಲಾಸ್ಗೋ ನಡೆಸಿದ ಹೊಸ ಅಧ್ಯಯನ ತಿಳಿಸಿದೆ. ಮಧ್ಯೆ ಮಧ್ಯೆ ಎದ್ದು ನಡೆಯುವುದು ಹಾಗೂ ನಿಯಮಿತವಾಗಿ ದೈಹಿಕ ಚಟುವಟಿಕೆಗಳಲ್ಲಿ ತೊಡಗುವುದು ಈ ಅಪಾಯವನ್ನು ಕಡಿಮೆ ಮಾಡಲು ಸಹಕಾರಿ ಎಂದು ಸಂಶೋಧಕರು ಸಲಹೆ ನೀಡಿದ್ದಾರೆ.
12 ವರ್ಷಗಳ ಕಾಲ ನಡೆದ ಅಧ್ಯಯನ
ಈ ಅಧ್ಯಯನವನ್ನು ಬ್ರಿಟನ್ನ ಯೂನಿವರ್ಸಿಟಿ ಆಫ್ ಗ್ಲಾಸ್ಗೋ ಸಂಶೋಧಕರು ನಡೆಸಿದ್ದು, ಇದರ ಫಲಿತಾಂಶಗಳನ್ನು PLOS Medicine ವೈದ್ಯಕೀಯ ಜರ್ನಲ್ನಲ್ಲಿ ಪ್ರಕಟಿಸಲಾಗಿದೆ. ಅಧ್ಯಯನದಲ್ಲಿ ಯುಕೆ ಬಯೋಬ್ಯಾಂಕ್ನ 91 ಸಾವಿರಕ್ಕೂ ಹೆಚ್ಚು ಜನರ ಆರೋಗ್ಯ ಮಾಹಿತಿಯನ್ನು ವಿಶ್ಲೇಷಿಸಲಾಯಿತು. ಭಾಗವಹಿಸಿದವರಿಗೆ ಒಂದು ವಾರದವರೆಗೆ ಕೈಗೆ ಧರಿಸುವ ಟ್ರ್ಯಾಕರ್ಗಳನ್ನು ನೀಡಿ, ಅವರು ಎಷ್ಟು ಸಮಯ ಕುಳಿತುಕೊಳ್ಳುತ್ತಾರೆ ಹಾಗೂ ಎಷ್ಟು ದೈಹಿಕ ಚಟುವಟಿಕೆ ಮಾಡುತ್ತಾರೆ ಎಂಬುದನ್ನು ದಾಖಲಿಸಲಾಯಿತು. ಬಳಿಕ ಅವರ ಆರೋಗ್ಯವನ್ನು ಸುಮಾರು 12 ವರ್ಷಗಳ ಕಾಲ ಪರಿಶೀಲಿಸಲಾಯಿತು.
ಯಾರಿಗೆ ಹೆಚ್ಚು ಅಪಾಯ ಕಂಡುಬಂದಿದೆ.?
ಅಧ್ಯಯನದ ಪ್ರಕಾರ, ಪ್ರತಿದಿನ 30 ನಿಮಿಷಕ್ಕಿಂತ ಹೆಚ್ಚು ಸಮಯ ಯಾವುದೇ ವಿರಾಮವಿಲ್ಲದೆ ಕುಳಿತುಕೊಳ್ಳುವವರಲ್ಲಿ ಕ್ಯಾನ್ಸರ್ನಿಂದ ಸಾವಿನ ಅಪಾಯ ಹೆಚ್ಚಿರುವುದು ಕಂಡುಬಂದಿದೆ.ಸಂಶೋಧಕರ ಪ್ರಕಾರ, ನಿರಂತರವಾಗಿ ಕುಳಿತುಕೊಳ್ಳುವ ಪ್ರತಿ ಹೆಚ್ಚುವರಿ ಗಂಟೆಗೆ ಅಪಾಯವು ಸುಮಾರು 9 ರಿಂದ 10 ಶೇಕಡಾವರೆಗೆ ಹೆಚ್ಚಾಗಬಹುದು. ಒಟ್ಟು ದಿನದಲ್ಲಿ ಎಷ್ಟು ಹೊತ್ತು ಕುಳಿತಿದ್ದೀರಿ ಎಂಬುದಕ್ಕಿಂತ, ಮಧ್ಯೆ ಎದ್ದೇಳದೆ ನಿರಂತರವಾಗಿ ಕುಳಿತುಕೊಳ್ಳುವುದು ಹೆಚ್ಚಿನ ಪರಿಣಾಮ ಬೀರುತ್ತದೆ ಎಂದು ಅಧ್ಯಯನ ತಿಳಿಸಿದೆ.
ಈ ಅಪಾಯವನ್ನು ಹೇಗೆ ಕಡಿಮೆ ಮಾಡಬಹುದು?
ಈ ಅಧ್ಯಯನದಲ್ಲಿ ಒಂದು ಉತ್ತಮ ಸಂಗತಿಯೂ ಬೆಳಕಿಗೆ ಬಂದಿದೆ. ಹೆಚ್ಚು ಹೊತ್ತು ಕುಳಿತು ಕೆಲಸ ಮಾಡಬೇಕಾದರೂ, ಮಧ್ಯೆ ಮಧ್ಯೆ ಎದ್ದು ಸ್ವಲ್ಪ ಹೊತ್ತು ನಡೆಯುವುದು ಅಥವಾ ಲಘು ದೈಹಿಕ ಚಟುವಟಿಕೆಗಳನ್ನು ಮಾಡುವುದು ಅಪಾಯವನ್ನು ಕಡಿಮೆ ಮಾಡಬಹುದು ಎಂದು ಸಂಶೋಧಕರು ತಿಳಿಸಿದ್ದಾರೆ.
• ಪ್ರತಿ ಗಂಟೆಗೆ ಕೆಲ ನಿಮಿಷ ನಡೆಯುವುದರಿಂದ ಅಥವಾ ಮನೆಯ ಸಣ್ಣಪುಟ್ಟ ಕೆಲಸಗಳನ್ನು ಮಾಡುವುದರಿಂದ ಕ್ಯಾನ್ಸರ್ನಿಂದ ಸಾವಿನ ಅಪಾಯವು ಸುಮಾರು 12% ವರೆಗೆ ಕಡಿಮೆಯಾಗಬಹುದು.
• ಪ್ರತಿದಿನ 30 ನಿಮಿಷ ವೇಗವಾಗಿ ನಡೆಯುವಂತಹ ಮಧ್ಯಮ ಮಟ್ಟದ ವ್ಯಾಯಾಮ ಮಾಡಿದರೆ ಅಪಾಯವು ಸುಮಾರು 8% ವರೆಗೆ ಕಡಿಮೆಯಾಗಬಹುದು.
• ಕೇವಲ 5 ನಿಮಿಷ ತೀವ್ರ ದೈಹಿಕ ವ್ಯಾಯಾಮ ಮಾಡಿದರೂ ಅಪಾಯವು ಸುಮಾರು 22% ವರೆಗೆ ಕಡಿಮೆಯಾಗುವ ಸಾಧ್ಯತೆ ಇದೆ ಎಂದು ಅಧ್ಯಯನ ಸೂಚಿಸಿದೆ.
ತಜ್ಞರು ಏನು ಹೇಳುತ್ತಾರೆ?
ಈ ಅಧ್ಯಯನದ ನೇತೃತ್ವ ವಹಿಸಿದ್ದ ಡಾ. ಫ್ರೆಡರಿಕ್ ಹೋ ಅವರ ಪ್ರಕಾರ, ಪ್ರತಿದಿನ ವ್ಯಾಯಾಮ ಮಾಡುವುದರ ಜೊತೆಗೆ ದೀರ್ಘಕಾಲ ಒಂದೇ ಸ್ಥಳದಲ್ಲಿ ಕುಳಿತುಕೊಳ್ಳುವ ಅಭ್ಯಾಸವನ್ನೂ ಬದಲಾಯಿಸಬೇಕು.ಪ್ರತಿ 30 ನಿಮಿಷಕ್ಕೊಮ್ಮೆ ಎದ್ದು 2 ರಿಂದ 5 ನಿಮಿಷಗಳ ಕಾಲ ನಡೆಯುವುದು ಅಥವಾ ದೇಹವನ್ನು ಸ್ವಲ್ಪ ಚಲಿಸುವಂತೆ ಮಾಡುವುದು ಆರೋಗ್ಯಕ್ಕೆ ಉತ್ತಮ ಎಂದು ಅವರು ಸಲಹೆ ನೀಡಿದ್ದಾರೆ. ಹೆಚ್ಚು ಹೊತ್ತು ಕುಳಿತುಕೊಳ್ಳುವುದರಿಂದ ಸ್ನಾಯುಗಳ ಚಟುವಟಿಕೆ ಕಡಿಮೆಯಾಗುತ್ತದೆ. ಇದರಿಂದ ರಕ್ತದಲ್ಲಿನ ಸಕ್ಕರೆ ಮಟ್ಟದ ಮೇಲೆ ಪರಿಣಾಮ ಬೀರುವುದು, ಇನ್ಸುಲಿನ್ ಪ್ರತಿರೋಧ ಹೆಚ್ಚಾಗುವುದು ಹಾಗೂ ದೇಹದಲ್ಲಿ ಉರಿಯೂತ (Inflammation) ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಹೇಳಿದ್ದಾರೆ.
ಗಮನಿಸಿ: ಈ ಅಧ್ಯಯನವು ಹೆಚ್ಚು ಹೊತ್ತು ಕುಳಿತುಕೊಳ್ಳುವುದು ಮತ್ತು ಕ್ಯಾನ್ಸರ್ನಿಂದ ಸಾವಿನ ಅಪಾಯದ ನಡುವೆ ಸಂಬಂಧವಿದೆ ಎಂಬುದನ್ನು ಮಾತ್ರ ಸೂಚಿಸುತ್ತದೆ. ಹೆಚ್ಚು ಹೊತ್ತು ಕುಳಿತುಕೊಳ್ಳುವುದೇ ನೇರವಾಗಿ ಕ್ಯಾನ್ಸರ್ಗೆ ಅಥವಾ ಕ್ಯಾನ್ಸರ್ನಿಂದ ಸಾವಿಗೆ ಕಾರಣವಾಗುತ್ತದೆ ಎಂಬುದನ್ನು ಈ ಅಧ್ಯಯನ ಸಾಬೀತುಪಡಿಸಿಲ್ಲ ಎಂದು ಸಂಶೋಧಕರು ಸ್ಪಷ್ಟಪಡಿಸಿದ್ದಾರೆ.
