ಅಮೆರಿಕದ ಕಾರ್ಡಿಯಾಕ್ ಐಸಿಯುನಲ್ಲಿ ಸುಮಾರು ಎರಡು ದಶಕಗಳ ಕಾಲ ಸೇವೆ ಸಲ್ಲಿಸಿದ ಅನುಭವಿ ನರ್ಸ್ ಪೆಟ್ರೀಷಿಯಾ ಮೂರ್ ಅವರ ಪ್ರಕಾರ, ನಾವು ಮಲಗುವ ರೀತಿ ನಮ್ಮ ಹೃದಯದ ಕಾರ್ಯಕ್ಷಮತೆಯ ಮೇಲೆ ನೇರ ಪರಿಣಾಮ ಬೀರುತ್ತದೆ. ಸುಮಾರು 3,000ಕ್ಕೂ ಹೆಚ್ಚು ಹೃದಯಾಘಾತದಿಂದ ಬದುಕುಳಿದವರನ್ನು ಗಮನಿಸಿದ ಅವರು, ರಾತ್ರಿಯ ಸಮಯದಲ್ಲಿ ಹೃದಯದ ಮೇಲಿನ ಯಾಂತ್ರಿಕ ಒತ್ತಡವನ್ನು ಕಡಿಮೆ ಮಾಡಲು ನಿರ್ದಿಷ್ಟ ಸಲಹೆಗಳನ್ನು ನೀಡಿದ್ದಾರೆ.
ಹೃದಯದ ಆರೋಗ್ಯಕ್ಕೆ ಯಾವ ಭಂಗಿ ಉತ್ತಮ?
ಪೆಟ್ರೀಷಿಯಾ ಅವರ ಪ್ರಕಾರ, ಎಡಭಾಗಕ್ಕೆ ತಿರುಗಿ ಮಲಗುವುದು (Left-side sleeping) ಮತ್ತು ಮೊಣಕಾಲುಗಳನ್ನು ಸ್ವಲ್ಪ ಮಡಚಿಕೊಳ್ಳುವುದು ಹೃದಯಕ್ಕೆ ಅತ್ಯಂತ ಸುರಕ್ಷಿತ.
ಒತ್ತಡ ಮುಕ್ತಿ : ಬೆನ್ನಿನ ಮೇಲೆ ಅಥವಾ ಬಲಭಾಗಕ್ಕೆ ತಿರುಗಿ ಮಲಗುವುದರಿಂದ ಹೃದಯದ ಮೇಲೆ ಯಾಂತ್ರಿಕ ಒತ್ತಡ ಉಂಟಾಗುತ್ತದೆ. ಎಡಭಾಗಕ್ಕೆ ಮಲಗಿದಾಗ ಈ ಒತ್ತಡ ಕಡಿಮೆಯಾಗುತ್ತದೆ.
ರಕ್ತ ಪರಿಚಲನೆ : ಎಡಭಾಗಕ್ಕೆ ಮಲಗುವುದರಿಂದ ರಕ್ತ ಪರಿಚಲನೆಯು ಸುಮಾರು ಶೇ. 40 ರಷ್ಟು ಸುಧಾರಿಸುತ್ತದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಸಲಹೆ : ಎರಡೂ ಮೊಣಕಾಲುಗಳ ನಡುವೆ ಒಂದು ದಿಂಬನ್ನು ಇಟ್ಟುಕೊಳ್ಳುವುದರಿಂದ ಬೆನ್ನುಮೂಳೆಯು ನೇರವಾಗಿರಲು (Spine Alignment) ಸಹಾಯವಾಗುತ್ತದೆ.
ಬಲಭಾಗಕ್ಕೆ ಅಥವಾ ಬೆನ್ನಿನ ಮೇಲೆ ಮಲಗಿದರೆ ಏನಾಗುತ್ತದೆ?
ಬಹಳಷ್ಟು ಜನರು ತಮಗೆ ಆರಾಮ ಎನಿಸುವ ಭಂಗಿಯಲ್ಲಿ ಮಲಗುತ್ತಾರೆ. ಆದರೆ, ಹೃದಯ ವೈಫಲ್ಯ (Heart Failure) ಅಥವಾ ದಮ್ಮು (Breathlessness) ಇರುವವರು ಹೆಚ್ಚಾಗಿ ಬಲಭಾಗಕ್ಕೆ ಮಲಗಲು ಇಷ್ಟಪಡುತ್ತಾರೆ ಏಕೆಂದರೆ ಇದು ಶ್ವಾಸಕೋಶದ ಮೇಲಿನ ಒತ್ತಡವನ್ನು ಕಡಿಮೆ ಮಾಡುತ್ತದೆ. ಆದರೆ ಸಾಮಾನ್ಯ ಹೃದಯದ ಆರೋಗ್ಯ ಹೊಂದಿರುವವರಿಗೆ ಎಡಭಾಗವೇ ಉತ್ತಮ ಎನ್ನಲಾಗಿದೆ.
ಹೊಸ ಭಂಗಿಯನ್ನು ಅಭ್ಯಾಸ ಮಾಡುವುದು ಹೇಗೆ?
ಬಹಳ ವರ್ಷಗಳಿಂದ ಒಂದು ನಿರ್ದಿಷ್ಟ ರೀತಿಯಲ್ಲಿ ಮಲಗುವ ಅಭ್ಯಾಸವಿದ್ದರೆ ಅದನ್ನು ಬದಲಿಸುವುದು ಕಷ್ಟ. ಪೆಟ್ರೀಷಿಯಾ ಅವರ ಕೆಲವು ಟಿಪ್ಸ್ ಇಲ್ಲಿವೆ:
ಬಾಡಿ ಪಿಲ್ಲೋ ಬಳಸಿ : ಮಗ್ಗುಲಿಗೆ ತಿರುಗಿ ಮಲಗಲು ಸಹಾಯವಾಗುವಂತೆ ಉದ್ದನೆಯ ದಿಂಬನ್ನು ಬಳಸಿ.
ಟಾಸ್ಸಿಂಗ್ ತಡೆಯಿರಿ : ರಾತ್ರಿ ತಿಳಿಯದಂತೆ ಬೆನ್ನಿನ ಮೇಲೆ ಮಲಗುವುದನ್ನು ತಡೆಯಲು ಶರ್ಟ್ನ ಹಿಂಭಾಗಕ್ಕೆ ಟೆನ್ನಿಸ್ ಬಾಲ್ ಅನ್ನು ಹೊಲಿದುಕೊಳ್ಳುವ ಹಳೆಯ ತಂತ್ರವನ್ನು ಬಳಸಬಹುದು.
ತಲೆ ಎತ್ತರವಿರಲಿ : ಉಸಿರಾಟದ ತೊಂದರೆ ಇರುವವರು ಹಾಸಿಗೆಯ ತಲೆಯ ಭಾಗವನ್ನು ಸ್ವಲ್ಪ ಎತ್ತರದಲ್ಲಿ ಇರಿಸಿಕೊಳ್ಳುವುದು ಉತ್ತಮ.
ತಾಳ್ಮೆ ಇರಲಿ : ಹೊಸ ಭಂಗಿಗೆ ಹೊಂದಿಕೊಳ್ಳಲು ಕನಿಷ್ಠ 3 ವಾರಗಳ ಸಮಯ ಬೇಕಾಗುತ್ತದೆ. ಆರಂಭದಲ್ಲಿ ಕಷ್ಟವೆನಿಸಿದರೂ ಅದು ಕ್ರಮೇಣ ರೂಢಿಯಾಗುತ್ತದೆ.
ವೈದ್ಯಕೀಯ ಎಚ್ಚರಿಕೆ : ಕೇವಲ ಮಲಗುವ ಭಂಗಿಯಿಂದಲೇ ಹೃದಯಾಘಾತವನ್ನು ಸಂಪೂರ್ಣ ತಡೆಯಲು ಸಾಧ್ಯವಿಲ್ಲ. ಇದು ಕೇವಲ ಒಂದು ಪೂರಕ ಅಂಶವಷ್ಟೇ. ಸಮತೋಲಿತ ಆಹಾರ, ವ್ಯಾಯಾಮ ಮತ್ತು ವೈದ್ಯರ ಸಲಹೆ ಅತ್ಯಗತ್ಯ.
