ಇಲ್ಲಿನ ಯುವಕನೊಬ್ಬ ಹಸುವೊಂದಕ್ಕೆ ಚಿಕನ್ ಮೊಮೊಸ್ ತಿನ್ನಿಸಿದ ಆರೋಪದ ಮೇಲೆ ಬಜರಂಗ ದಳ ಹೆಸರಿನ ಗುಂಪೊಂದು ಆತನನ್ನು ಥಳಿಸಿ, ಬೀದಿಯಲ್ಲಿ ಮೆರವಣಿಗೆ ನಡೆಸಿ, ಎಫ್ಐಆರ್ ದಾಖಲಾಗುವಂತೆ ಮಾಡಿದ ಘಟನೆ ನಡೆದಿದೆ.
ನಿಕ್ಕು ಪಂಡಿತ್ ಎಂಬುವವರು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಿಂದ ಹಂಚಿಕೊಂಡಿರುವ ವಿಡಿಯೋದಲ್ಲಿ ʻ28 ವರ್ಷದ ಯುವಕನೊಬ್ಬನನ್ನು ಐದಕ್ಕೂ ಹೆಚ್ಚು ಮಂದಿ ರಸ್ತೆಯಲ್ಲಿ ಕರೆದುಕೊಂಡು ಮೆರವಣಿಗೆ ಮಾಡುತ್ತಿರುವುದು.
ಜೊತಗೆ ಆತನ ಬಾಯಿಂದ ಜೈ ಶ್ರೀರಾಮ್, ಜೈ ಗೋ ಮಠ ಎಂದು ಹೇಳಿಸುತ್ತಿರುವುದು, ಹಿಗ್ಗಾಮುಗ್ಗ ಕುಕ್ಕಿ, ಎಳೆದಾಡಿ ಹೊಡೆದಿರುವುದು ವ್ಯಕ್ತಿಯೊಬ್ಬ ಮೊಬೈಲ್ನಲ್ಲಿ ರೆಕಾರ್ಡ್ ಮಾಡುತ್ತಿರುವ ವಿಡಿಯೋದಲ್ಲಿ ಸೆರೆಯಾಗಿದೆ. ಈ ವಿಡಿಯೋ ವೈರಲ್ ಆಗಿದ್ದು, ಕೆಲವರು ಗುಂಪಿನ ವರ್ತನೆ ಬಗ್ಗೆ ಕಿಡಿಕಾರಿದ್ದಾರೆ. ಮತ್ತೂ ಕೆಲವರು ಸರಿಯಾದ ಶಿಕ್ಷೆ ಎಂದಿದ್ದಾರೆ.
ಬಂಧನ, ಬಿಡುಗಡೆ
ಗುರ್ಗಾಂವ್ನ ನ್ಯೂ ಕಾಲೋನಿ ನಿವಾಸಿ ರಿತಿಕ್ ಎಂಬ ಯುವಕನೇ ಬಜರಂಗದಳ ಗುಂಪಿನಿಂದ ಹಲ್ಲೆಗೊಳಗಾದವರು. ಎಂದು ಗುರುತಿಸಲಾಗಿದೆ. ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತಂದ ಆರೋಪದ ಮೇಲೆ ಅವರನ್ನು ಪೊಲೀಸರು ಬಂಧಿಸಿದ್ದರು. ಆದರೆ, ನಂತರ ಅವರಿಗೆ ಜಾಮೀನು ನೀಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ ಎನ್ನಲಾಗಿದೆ.
ರಿತಿಕ್ ಡಿ.7ರಂದು ‘ಪ್ರಿಸ್ಮ್’ ಎಂಬ ಆಯಪ್ನಲ್ಲಿ ಲೈವ್ ಸ್ಟ್ರೀಮಿಂಗ್ ಮಾಡುತ್ತಿದ್ದರು. ಈ ವೇಳೆ ಅವರು ಪೂರ್ತಿ ಪ್ಲೇಟ್ ಮೊಮೊಸ್ ತಿನ್ನುವ ಚಾಲೆಂಜ್ ತೆಗೆದುಕೊಂಡಿದ್ದರು. ವಿಡಿಯೋದಲ್ಲಿ ಅವರು ಮೊಮೊಸ್ ಮಾರಾಟಗಾರರ ಬಳಿ ಒಂದು ಪ್ಲೇಟ್ ಚಿಕನ್ ಮೊಮೊಸ್ ಕೊಂಡುಕೊಂಡಿರುವುದು ಕಾಣಸಿಗುತ್ತದೆ. ಮೊಮೊಸ್ ತಗೊಂಡ ನಂತರ ಅವರಿಗೆ ಪೂರ್ತಿ ತಿನ್ನಲು ಅಸಾಧ್ಯವಾದಾಗ ಅವರು ಉಳಿದದ್ದನ್ನು ಹತ್ತಿರದಲ್ಲೇ ನಿಂತಿದ್ದ ಹಸುವಿಗೆ ತಿನ್ನಿಸುವುದು ಲೈವ್ನಲ್ಲಿ ರೆಕಾರ್ಡ್ ಆಗಿದೆ.
ಬಜರಂಗದಳದಿಂದ ಕಿಡಿ
ಚಮನ್ ಖಟಾನಾ ಎಂಬುವವರು ತಾವು ಬಜರಂಗದಳದವರು ಎಂದು ಗುರುತಿಸಿಕೊಂಡಿದ್ದು, ಅವರ ಇನ್ಸ್ಟಾಗ್ರಾಮ್ ಖಾತೆಯಿಂದ ಈ ರಿತಿಕ್ ಅವರು ಹಸುವಿಗೆ ಮೊಮೊಸ್ ತಿನ್ನಿಸಿದ ವಿಡಿಯೋ ಹಂಚಿಕೊಂಡಿದ್ದಾರೆ. ಈ ವಿಡಿಯೋ ವೈರಲ್ ಆಯಿತು.
ಇದನ್ನು ಕಂಡ ಸ್ಥಳೀಯ ಗೋ ರಕ್ಷಕ ಗುಂಪು ರೊಚ್ಚಿಗೆದ್ದು, ಸೋಮವಾರದಂದು ಖಟಾನಾ ಮತ್ತು ಅವರ ಸಹಚರರು ರಿತಿಕ್ ಮನೆಗೆ ತಲುಪಿದರು. ಅಲ್ಲಿ ರಿತಿಕ್ ತಂದೆಯೊಂದಿಗೆ, ಗೋ ರಕ್ಷಕರ ಗುಂಪು ವಾಗ್ವಾದಕ್ಕಿಳಿದವು. ಅಷ್ಟೇ ಅಲ್ಲದೆ ಆ ಚರ್ಚೆಯನ್ನು ರೆಕಾರ್ಡ್ ಮಾಡಿಕೊಳ್ಳಲು ಆರಂಭಿಸಿದರು. ಒಂದು ಕ್ಲಿಪ್ನಲ್ಲಿ, ಖಟಾನಾ ಅವರು ರಿತಿಕ್ ತಂದೆಯ ಬಳಿ ಕ್ಷಮೆಯಾಚಿಸಲು ಒತ್ತಾಯಿಸುವುದು ಮತ್ತು ಮಗನಿಗೆ ಥಳಿಸುವುದಾಗಿ ಬೆದರಿಕೆ ಹಾಕುವುದು ಸಹ ವಿಡಿಯೋದಲ್ಲಿ ಇದೆ. ಆ ನಂತರ ರಿತಿಕ್ ಅವರನ್ನು ಮನೆಯಿಂದ ಹೊರಗೆ ಕರೆತಂದು, ತಂದೆಯೊಂದಿಗೆ ಬೀದಿಯಲ್ಲಿ ಮೆರವಣಿಗೆ ಮಾಡಿಸಿದ್ದಾರೆ.
ನೆಟ್ಟಿಗರಲ್ಲೇ ಜಟಾಪಟಿ
Cabbage ಎಂಬ ಖಾತೆಯ ಯುವಕ ವಿಡಿಯೋಗೆ ಕಾಮೆಂಟ್ ಮಾಡಿದ್ದು, ಹಸುವಿಗೆ ಎತ್ತಿಗೆ ನಿಮಗೆ ವ್ಯತ್ಯಾಸವೇ ಗೊತ್ತಿಲ್ವಲ್ಲ ಎಂದು ಕಿಡಿಕಾರಿದ್ದಾರೆ. ಇದಕ್ಕೆ ಮತ್ತೊಬ್ಬ ಯಾವುದೇ ಪ್ರಾಣಿಯಾಗಲಿ ನಡೆದಿರುವುದು ಹಿಂಸೆಯೇ ಅಲ್ಲವೇ ಎಂದಿದ್ದಾರೆ. ಮತ್ತೆ ಕಾಮೆಂಟ್ ಮಾಡಿರು Cabbage ಅವರು, ಗೋಮಾತೆ ಪ್ಲಾಸ್ಟಿಕ್ ತಿನ್ನುವ ಬಾಯ್ಮುಚ್ಚಿಕೊಂಡು ಇರುವವರು ಇವರು. ಇಂತಹ ಘಟನೆ ನಡೆದಾಗ ಪ್ರತ್ಯಕ್ಷರಾಗಿ ಬಿಡುತ್ತಾರೆ ಎಂದಿದ್ದಾರೆ.
