ಮಹಾರಾಷ್ಟ್ರ: ರಜೆ ಕಳೆಯಲು ಸೋದರಮಾವನ ಮನೆಗೆ ಅತ್ಯಂತ ಸಂತೋಷದಿಂದ ಹೊರಟಿದ್ದ ಇಬ್ಬರು ಅಕ್ಕ-ತಂಗಿಯರನ್ನು ಮಾರ್ಗಮಧ್ಯದಲ್ಲೇ ವಿಧಿ ಮೃತ್ಯು ರೂಪದಲ್ಲಿ ಆಪೋಶನ ತೆಗೆದುಕೊಂಡಿರುವ ಘೋರ ಘಟನೆ ಮಹಾರಾಷ್ಟ್ರದಲ್ಲಿ ನಡೆದಿದೆ.
ನಿರಾ-ಮೋರ್ಗಾಂವ್ ರಾಜ್ಯ ಹೆದ್ದಾರಿಯ ಚೌಧರವಾಡಿ ಫಾಟಾ ಸಮೀಪ ನಡೆದ ಭೀಕರ ರಸ್ತೆ ಅಪಘಾತದಲ್ಲಿ ಇಬ್ಬರು ಸೋದರಿಯರು ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ.
ಮೃತರನ್ನು ಸೇಜಲ್ ಜ್ಞಾನೇಶ್ವರ್ ಬೋರ್ಡೆ (17) ಮತ್ತು ಅಕ್ಷರಾ ಜ್ಞಾನೇಶ್ವರ್ ಬೋರ್ಡೆ (15) ಎಂದು ಗುರುತಿಸಲಾಗಿದೆ. ಇವರೊಂದಿಗೆ ಪ್ರಯಾಣಿಸುತ್ತಿದ್ದ ಇವರ ಕಿರಿಯ ಸಹೋದರ ಪವನ್ (12) ತೀವ್ರವಾಗಿ ಗಾಯಗೊಂಡಿದ್ದು, ಪ್ರಸ್ತುತ ಆಸ್ಪತ್ರೆಯಲ್ಲಿ ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದಾನೆ. ಈ ಹೃದಯವಿದ್ರಾವಕ ಘಟನೆಯಿಂದಾಗಿ ಫಲಿತಾನ್ ಹಾಗೂ ಮುರುಮ್ ಭಾಗದಲ್ಲಿ ತೀವ್ರ ಶೋಕ ವಾತಾವರಣ ನಿರ್ಮಾಣವಾಗಿದೆ.
ಅಷ್ಟಕ್ಕೂ ನಡೆದಿದ್ದೇನು.?
ಮಾಹಿತಿಯ ಪ್ರಕಾರ, ಫಲಿತಾನ್ ತಾಲೂಕಿನ ಮುರುಮ್ ನಿವಾಸಿಗಳಾದ ಈ ಮೂವರು ಒಡಹುಟ್ಟಿದವರು ಶನಿವಾರ ಸಂಜೆ ಎಲೆಕ್ಟ್ರಿಕ್ ಸ್ಕೂಟಿಯಲ್ಲಿ ಸೋದರಮಾವನ ಮನೆಗೆ ಹೊರಟಿದ್ದರು. ಬಾರಾಮತಿ ತಾಲೂಕಿನ ‘ಮುರ್ತಿ’ ಇವರ ಸೋದರಮಾವನ ಗ್ರಾಮವಾಗಿತ್ತು. ಇವರು ನಿರಾ-ಮೋರ್ಗಾಂವ್ ರಾಜ್ಯ ಹೆದ್ದಾರಿಯ ಚೌಧರಿ ಫಾಟಾ ಬಳಿ ತಲುಪುತ್ತಿದ್ದಂತೆ, ಎದುರುಗಡೆಯಿಂದ ಬಂದ ಐಷರ್ ಟೆಂಪೋ ಇವರ ಸ್ಕೂಟಿಗೆ ಮುಖಾಮುಖಿ ಡಿಕ್ಕಿ ಹೊಡೆದಿದೆ.
ಅಪಘಾತದ ತೀವ್ರತೆ ಎಷ್ಟಿತ್ತೆಂದರೆ ಸ್ಕೂಟಿ ಸಂಪೂರ್ಣವಾಗಿ ನಜ್ಜುಗುಜ್ಜಾಗಿದೆ. ಅಪಘಾತದ ನಂತರವೂ ಟೆಂಪೋ ಸ್ಕೂಟಿಯನ್ನು ಸ್ವಲ್ಪ ದೂರದವರೆಗೆ ಎಳೆದೊಯ್ದಿದೆ. ಇದರಿಂದಾಗಿ ಗಂಭೀರವಾಗಿ ಗಾಯಗೊಂಡ ಸೇಜಲ್ ಮತ್ತು ಅಕ್ಷರಾ ಸ್ಥಳದಲ್ಲೇ ಪ್ರಾಣ ಬಿಟ್ಟಿದ್ದಾರೆ. ತೀವ್ರವಾಗಿ ಗಾಯಗೊಂಡಿದ್ದ ಬಾಲಕ ಪವನ್ನನ್ನು ತಕ್ಷಣವೇ ಬಾರಾಮತಿಯ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಪರಿಸ್ಥಿತಿ ವಿಷಮಿಸಿದ ಕಾರಣ ಹೆಚ್ಚಿನ ಚಿಕಿತ್ಸೆಗಾಗಿ ಆತನನ್ನು ಪುಣೆಯ ಖಾಸಗಿ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ.
ಘಟನೆಯ ಬಗ್ಗೆ ತಿಳಿಯುತ್ತಿದ್ದಂತೆ ಸುತ್ತಮುತ್ತಲಿನ ಜನರು ಸ್ಥಳಕ್ಕೆ ಧಾವಿಸಿದ್ದು, ಅಲ್ಲಿನ ಭೀಕರ ದೃಶ್ಯವನ್ನು ಕಂಡು ದಿಗ್ಭ್ರಮೆಗೊಂಡಿದ್ದಾರೆ. ವಿಷಯ ತಿಳಿದ ವಾಡ್ಗಾಂವ್ ನಿಂಬಾಳ್ಕರ್ ಪೊಲೀಸರು ಸ್ಥಳಕ್ಕೆ ಧಾವಿಸಿ, ಟೆಂಪೋ ಚಾಲಕನನ್ನು ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಸ್ವಲ್ಪ ಸಮಯದ ಹಿಂದೆಯಷ್ಟೇ ಸೋದರಮಾವನ ಮನೆಗೆ ಹೋಗುವ ಉತ್ಸಾಹದಲ್ಲಿದ್ದ ಮಕ್ಕಳ ಬದುಕು ಹೀಗೆ ಅರ್ಧಕ್ಕೇ ಮುಗಿದುಹೋಗಿರುವುದನ್ನು ಕಂಡು ಪೋಷಕರು ಮತ್ತು ಸಂಬಂಧಿಕರ ಆಕ್ರಂದನ ಮುಗಿಲು ಮುಟ್ಟಿದೆ. ಸೇಜಲ್ ದ್ವಿತೀಯ ಪಿಯುಸಿ (12ನೇ ತರಗತಿ) ಓದುತ್ತಿದ್ದರೆ, ಅಕ್ಷರಾ ಈ ಬಾರಿ 10ನೇ ತರಗತಿಗೆ ಪ್ರವೇಶ ಪಡೆದಿದ್ದಳು.
ಇಬ್ಬರೂ ವಿದ್ಯಾಭ್ಯಾಸದಲ್ಲಿ ಅತ್ಯಂತ ಚುರುಕಾಗಿದ್ದು, ಭವಿಷ್ಯದಲ್ಲಿ ‘ಏರ್ ಹೋಸ್ಟೆಸ್’ ಆಗಬೇಕೆಂಬ ಕನಸು ಹೊಂದಿದ್ದರು. ಆದರೆ ವಿಧಿಯ ಆಟ ಆ ಕುಟುಂಬಕ್ಕೆ ಎಂದಿಗೂ ಮರೆಯಲಾಗದ ದುಃಖವನ್ನು ತಂದಿಟ್ಟಿದೆ. ಪ್ರಸ್ತುತ 6ನೇ ತರಗತಿಯಲ್ಲಿ ಓದುತ್ತಿರುವ ಇವರ ತಮ್ಮ ಪವನ್, ಪುಣೆಯ ಆಸ್ಪತ್ರೆಯಲ್ಲಿ ಜೀವನ್ಮರಣ ಹೋರಾಟ ನಡೆಸುತ್ತಿದ್ದಾನೆ.
