ಕೆನರಾ ಬ್ಯಾಂಕ್ ತನ್ನ ಗ್ರಾಹಕರಿಗೆ ಸಿಹಿ ಸುದ್ದಿ ನೀಡಿದ್ದು, ಜೂನ್ 1, 2025 ರಿಂದ ಎಲ್ಲಾ ಉಳಿತಾಯ ಖಾತೆಗಳಿಗೆ ಕನಿಷ್ಠ ಬ್ಯಾಲೆನ್ಸ್ ನಿರ್ವಹಿಸುವ ಅಗತ್ಯವನ್ನು ತೆಗೆದುಹಾಕಿದೆ. ಈ ಹೊಸ ನಿಯಮವು ಎಲ್ಲಾ ವರ್ಗದ ಖಾತೆಗಳಿಗೂ ಅನ್ವಯವಾಗಲಿದ್ದು, ಗ್ರಾಹಕರಿಗೆ ದಂಡದ ಹೊರೆಯಿಂದ ಮುಕ್ತಿ ಸಿಗಲಿದೆ. ಹಣಕಾಸು ಸೇರ್ಪಡೆಯನ್ನು ಹೆಚ್ಚಿಸುವ ಗುರಿಯೊಂದಿಗೆ ಈ ನಿರ್ಧಾರ ಕೈಗೊಳ್ಳಲಾಗಿದೆ.
ಸಾರ್ವಜನಿಕ ರಂಗದ ಪ್ರಮುಖ ಬ್ಯಾಂಕ್ ಆಗಿರುವ ಕೆನರಾ ಬ್ಯಾಂಕ್ ತನ್ನ ಕೋಟ್ಯಂತರ ಗ್ರಾಹಕರಿಗೆ ಸಿಹಿ ಸುದ್ದಿ ನೀಡಿದೆ. ಜೂನ್ 1, 2025 ರಿಂದ ಅನ್ವಯವಾಗುವಂತೆ ಎಲ್ಲಾ ಉಳಿತಾಯ ಖಾತೆಗಳಿಗೆ ಕನಿಷ್ಠ ಬ್ಯಾಲೆನ್ಸ್ ಅಗತ್ಯವನ್ನು ತೆಗೆದುಹಾಕಿದೆ. ಈ ಹೊಸ ನೀತಿಯು ಎಲ್ಲಾ ವರ್ಗದ ಉಳಿತಾಯ ಖಾತೆಗಳಿಗೆ ಅನ್ವಯವಾಗಲಿದ್ದು, ಗ್ರಾಹಕರಿಗೆ ಅನುಕೂಲವಾಗಲಿದೆ.
ಹಣಕಾಸು ಸೇರ್ಪಡೆಯನ್ನು ಹೆಚ್ಚಿಸುವ ಗುರಿಯೊಂದಿಗೆ ಕೆನರಾ ಬ್ಯಾಂಕ್ ಈ ಘೋಷಣೆ ಮಾಡಿದೆ. ಈ ನಿರ್ಧಾರದೊಂದಿಗೆ, ಕನಿಷ್ಠ ಬ್ಯಾಲೆನ್ಸ್ ದಂಡವನ್ನು ಮನ್ನಾ ಮಾಡಿದ ಮೊದಲ ಪ್ರಮುಖ ಸಾರ್ವಜನಿಕ ವಲಯದ ಬ್ಯಾಂಕ್ ಆಗಿ ಕೆನರಾ ಗುರುತಿಸಿಕೊಂಡಿದೆ.
ಈ ಹೊಸ ನಿಯಮವು ಸಾಮಾನ್ಯ, ಸಂಬಳ ಮತ್ತು ಎನ್‌ಆರ್‌ಐ ಖಾತೆಗಳು ಸೇರಿದಂತೆ ಉಳಿತಾಯ ಖಾತೆಗಳ ಎಲ್ಲಾ ವರ್ಗಗಳಿಗೂ ಅನ್ವಯಿಸುತ್ತದೆ.
ಈ ಕುರಿತು ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿರುವ ಕೆನರಾ ಬ್ಯಾಂಕ್, “1 ಜೂನ್ 2025 ರಿಂದ, ಕನಿಷ್ಠ ಬ್ಯಾಲೆನ್ಸ್ ನಿರ್ವಹಿಸದಿದ್ದರೂ ಕೆನರಾ ಬ್ಯಾಂಕ್ ಯಾವುದೇ ದಂಡ ವಿಧಿಸುವುದಿಲ್ಲ” ಎಂದು ಹೇಳಿದೆ.
ಹಿಂದಿನ ನಿಯಮಗಳ ಪ್ರಕಾರ, ನಗರ ಪ್ರದೇಶದ ಶಾಖೆಗಳಲ್ಲಿ ಖಾತೆದಾರರು ಸರಾಸರಿ ಮಾಸಿಕ ಬ್ಯಾಲೆನ್ಸ್ (ಎಎಂಬಿ) 2,000 ರೂ., ಅರೆ-ನಗರ ಪ್ರದೇಶದ ಶಾಖೆಗಳಲ್ಲಿ 1,000 ರೂ. ಮತ್ತು ಗ್ರಾಮೀಣ ಪ್ರದೇಶದ ಶಾಖೆಗಳಲ್ಲಿ 500 ರೂ. ನಿರ್ವಹಿಸಬೇಕಿತ್ತು. ಈ ಮಿತಿಯನ್ನು ತಲುಪಲು ವಿಫಲವಾದರೆ ಬ್ಯಾಂಕ್ ದಂಡ ವಿಧಿಸುತ್ತಿತ್ತು.
ಈ ಹಿಂದೆ ಇದ್ದ ಕನಿಷ್ಠ ಬ್ಯಾಲೆನ್ಸ್ ನಿರ್ವಹಣೆಯ ನಿಯಮದಿಂದ ಅನೇಕ ಬಡ ಮತ್ತು ಮಧ್ಯಮ ವರ್ಗದ ಜನರು ತೊಂದರೆ ಅನುಭವಿಸುತ್ತಿದ್ದರು. ಹಲವರು ಕಡಿಮೆ ಬ್ಯಾಲೆನ್ಸ್ ನಿರ್ವಹಿಸಿದ ಕಾರಣಕ್ಕೇ ವರ್ಷಕ್ಕೆ 500 ರೂ.ವರೆಗೆ ದಂಡ ಪಾವತಿಸಿದ್ದೂ ಇದೆ. ಇದೀಗ ಈ ನಿಯಮವನ್ನು ತೆಗೆದು ಹಾಕುವ ಮೂಲಕ ತನ್ನ ಗ್ರಾಹಕರಿಗೆ ಬ್ಯಾಂಕ್ ರಿಲೀಫ್‌ ನೀಡಿದೆ.
ಈ ನಿರ್ಧಾರದಿಂದ ವಿದ್ಯಾರ್ಥಿಗಳು, ಸಂಬಳ ಪಡೆಯುವ ವೃತ್ತಿಪರರು, ಹಿರಿಯ ನಾಗರಿಕರು, ಎನ್‌ಆರ್‌ಐಗಳು ಮತ್ತು ಮೊದಲ ಬಾರಿಗೆ ಖಾತೆ ತೆರೆಯುವವರು ಸೇರಿದಂತೆ ಅನೇಕ ಗ್ರಾಹಕರಿಗೆ ಪ್ರಯೋಜನ ನೀಡುವ ನಿರೀಕ್ಷೆಯಿದೆ.
ವಿವಿಧ ಬ್ಯಾಂಕ್‌ಗಳಲ್ಲಿ ಹೇಗಿದೆ ನಿಯಮ?
ದೇಶದ ಅತಿ ದೊಡ್ಡ ಬ್ಯಾಂಕ್ ಆಗಿರುವ ಸಾರ್ವಜನಿಕ ರಂಗದ ಎಸ್‌ಬಿಐನಲ್ಲಿಯೂ ಈ ರೀತಿಯ ಶುಲ್ಕ ಇಲ್ಲ. ಆದರೆ ಎಸ್‌ಬಿಐ ಹೊರತುಪಡಿಸಿದರೆ ಇನ್ನಿತರ ಪ್ರಮುಖ ಬ್ಯಾಂಕ್‌ಗಳಾದ ಎಚ್‌ಡಿಎಫ್‌ಸಿ, ಐಸಿಐಸಿಯ ಬ್ಯಾಂಕ್, ಆಕ್ಸಿಸ್‌ ಬ್ಯಾಂಕ್, ಪಂಜಾಬ್‌ ನ್ಯಾಷನಲ್ ಬ್ಯಾಂಕ್, ಬ್ಯಾಂಕ್ ಆಫ್‌ ಬರೋಡಾ ಸೇರಿ ಇನ್ನಿತರ ಎಲ್ಲಾ ಬ್ಯಾಂಕ್‌ಗಳಲ್ಲಿ ಮಿನಿಮಂ ಬ್ಯಾಲೆನ್ಸ್ ನಿರ್ವಹಿಸದಿದ್ದರೆ ದಂಡ ಇದೆ.
ಮಾಸಿಕ ಸರಾಸರಿ ಬ್ಯಾಲೆನ್ಸ್ ದಂಡ ಹೋಲಿಕೆ
ಬ್ಯಾಂಕ್ ಹೆಸರು ಕನಿಷ್ಠ ಮಾಸಿಕ ಸರಾಸರಿ ಮೊತ್ತ ಶುಲ್ಕ
ಎಚ್‌ಡಿಎಫ್‌ಸಿ ಬ್ಯಾಂಕ್
ನಗರ ಪ್ರದೇಶ: ₹10,000
ಪಟ್ಟಣ ಪ್ರದೇಶ: ₹5,000
ಗ್ರಾಮೀಣ: ₹2,500 ₹600 (ಗರಿಷ್ಠ)
ಎಸ್‌ಬಿಐ ₹0 ₹0
ಐಸಿಐಸಿಐ ಬ್ಯಾಂಕ್ ನಗರ ಪ್ರದೇಶ: ₹10,000 ₹450 (ಗರಿಷ್ಠ)
ಆಕ್ಸಿಸ್‌ ಬ್ಯಾಂಕ್ ಎಲ್ಲಾ ಪ್ರದೇಶಗಳಿಗೆ: ₹10,000 ₹600 (ಗರಿಷ್ಠ)
ಕೆನರಾ ಬ್ಯಾಂಕ್ ₹0 ₹0
ಪಂಜಾಬ್‌ ನ್ಯಾಷನಲ್ ಬ್ಯಾಂಕ್
ಮೆಟ್ರೋ ನಗರ: ₹10,000 ನಗರ: ₹5,000 ಪಟ್ಟಣ ಪ್ರದೇಶ: ₹2,000 ಗ್ರಾಮೀಣ: ₹1,000 ₹450 (ಗರಿಷ್ಠ)
ಬ್ಯಾಂಕ್ ಆಫ್‌ ಬರೋಡಾ ನಗರ ಪ್ರದೇಶ: ₹5,000 ಪಟ್ಟಣ ಪ್ರದೇಶ: ₹1,000 ಗ್ರಾಮೀಣ: ₹500 ₹120 (ಗರಿಷ್ಠ)
