ಕರ್ನಾಟಕ ರೈಲ್ವೆ ಪ್ರಯಾಣಿಕರಿಗೆ ಗುಡ್ನ್ಯೂಸ್. ನೈರುತ್ಯ ರೈಲ್ವೈ ಹೊಸ ವರ್ಷದ ಉಡುಗೊರೆಯಾಗಿ 10 ಹೊಸ ಮೆಮು ರೈಲು ಸಿಗಲಿದೆ. ಈ ಬಗ್ಗೆ ಕೇಂದ್ರ ಸಚಿವರ ಜತೆ ರಾಜ್ಯದ ಸಚಿವರು, ಸಂಸದರು ಮಾತುಕತೆ ನಡೆಸಿದ್ದಾರೆ. ಶೀಘ್ರದಲ್ಲಿಯೇ ಬಹುದಿನಗಳ ಬೇಡಿಕೆಯಾಗಿದ್ದ ಮೆಮು ರೈಲುಗಳ ಸಂಚಾರವನ್ನು ವಿಸ್ತರಿಸಲು ರೈಲ್ವೇ ಇಲಾಖೆ ಈಗ ಮಹತ್ವದ ನಿರ್ಧಾರವನ್ನು ಕೈಗೊಳ್ಳುತ್ತಿದೆ.
ಹೊಸ ರೈಲುಗಳಿಂದ ಉತ್ತರ ಕರ್ನಾಟಕ ಹಾಗೂ ಹಳೇ ಮೈಸೂರು ಭಾಗದ ಪ್ರಯಾಣಿಕರಿಗೆ ದೊಡ್ಡ ಮಟ್ಟದ ಅನುಕೂಲವನ್ನು ಕಲ್ಪಿಸಲಿದೆ. ಇದು ಕೇವಲ ರೈಲು ಸಂಚಾರ ಅಲ್ಲ, ಸಣ್ಣ ಪುಟ್ಟ ಊರುಗಳ ಜನರ ಪಾಲಿಗೆ ಸಾರಿಗೆ ಸಂಜೀವಿನಿಯಾಗಲಿದೆ.
ಅಶ್ವಿನಿ ವೈಷ್ಣವ್ ಜತೆ ಪ್ರಹ್ಲಾದ್ ಜೋಶಿ ಮಾತುಕತೆ
ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಅವರು ಇತ್ತೀಚೆಗೆ ರೈಲ್ವೇ ಸಚಿವ ಅಶ್ವಿನಿ ವೈಷ್ಣವ್ ಅವರನ್ನು ಭೇಟಿ ಮಾಡಿ, ಈ ಭಾಗದ ರೈಲ್ವೇ ಸಮಸ್ಯೆಗಳ ಬಗ್ಗೆ ಸುದೀರ್ಘ ಚರ್ಚೆಯನ್ನು ನಡೆಸಿದ್ದರು. ಇದೇ ವೇಳೆ ಮೆಮು ರೈಲುಗಳ ಬಗ್ಗೆಯೂ ಪ್ರಸ್ತಾಪಿಸಲಾಗಿದೆ. ವಿಶೇಷವಾಗಿ ಸಣ್ಣ ನಿಲ್ದಾಣಗಳಲ್ಲಿ ಎಕ್ಸ್ಪ್ರೆಸ್ ರೈಲುಗಳು ನಿಲುಗಡೆ ನೀಡುವುದಿಲ್ಲ ಎಂಬ ದೂರಿನ ಹಿನ್ನೆಲೆಯಲ್ಲಿ, ಕನಿಷ್ಠ 10 ಹೊಸ ಮೆಮು ರೈಲುಗಳನ್ನು ಒದಗಿಸುವಂತೆ ಅವರು ಮನವಿ ಮಾಡಿದ್ದರು. ಇದಕ್ಕೆ ಪೂರಕವಾಗಿ ಸ್ಪಂದಿಸಿರುವ ರೈಲ್ವೇ ಸಚಿವಾಲಯ, ಈಗಾಗಲೇ ಮೂರು ಮೆಮು ರೈಲುಗಳನ್ನು ಮಂಜೂರು ಮಾಡಿದ್ದು, ಉಳಿದ ರೈಲುಗಳನ್ನು ಹಂತ ಹಂತವಾಗಿ ಶೀಘ್ರದಲ್ಲೇ ಒದಗಿಸುವ ಭರವಸೆ ನೀಡಿದೆ. ಇದು ಈ ಭಾಗದ ಸಾರಿಗೆ ವ್ಯವಸ್ಥೆಯಲ್ಲಿ ಹೊಸ ಕ್ರಾಂತಿಯನ್ನು ಉಂಟುಮಾಡಲಿದೆ ಎಂದು ನಿರೀಕ್ಷಿಸಲಾಗಿದೆ.
ಯಾವೆಲ್ಲಾ ಮಾರ್ಗದಲ್ಲಿ ಮೆಮು ರೈಲು?
• ಹುಬ್ಬಳ್ಳಿ – ಗದಗ – ಹುಬ್ಬಳ್ಳಿ
• ಹುಬ್ಬಳ್ಳಿ – ದಾಂಡೇಲಿ – ಹುಬ್ಬಳ್ಳಿ
• ಹುಬ್ಬಳ್ಳಿ – ವಿಜಯಪುರ – ಹುಬ್ಬಳ್ಳಿ
• ಹುಬ್ಬಳ್ಳಿ – ದಾವಣಗೆರೆ – ಹುಬ್ಬಳ್ಳಿ
• ಹುಬ್ಬಳ್ಳಿ – ಬಳ್ಳಾರಿ – ಹುಬ್ಬಳ್ಳಿ
• ಹೊಸಪೇಟೆ – ದಾವಣಗೆರೆ – ಹೊಸಪೇಟೆ
• ಬಾಗಲಕೋಟೆ – ಲೋಕಾಪುರ – ಬಾಗಲಕೋಟೆ
• ಹುಬ್ಬಳ್ಳಿ – ಸಿಂಧನೂರು – ಹುಬ್ಬಳ್ಳಿ
• ಬೆಂಗಳೂರು – ಚಾಮರಾಜನಗರ – ಬೆಂಗಳೂರು
• ಹುಬ್ಬಳ್ಳಿ – ಚಿತ್ರದುರ್ಗ – ಹುಬ್ಬಳ್ಳಿ
• ಬಳ್ಳಾರಿ – ದೊಡ್ಡಹಳ್ಳಿ – ಬಳ್ಳಾರಿ
• ಬೀರೂರು – ತಾಳಗುಪ್ಪ – ಬೀರೂರು
• ಬೆಳಗಾವಿ – ಮಿರಜ್ – ಬೆಳಗಾವಿ
• ವಿಜಯಪುರ – ಸೊಲ್ಲಾಪುರ – ವಿಜಯಪುರ
15 ಜಿಲ್ಲೆಗಳಿಗೆ ಅನುಕೂಲ
ಈ 14 ಮಾರ್ಗದಲ್ಲಿ ರೈಲು ಓಡಾಟದಿಂದ ರಾಜ್ಯದ 15 ಜಿಲ್ಲೆಗಳಿಗೆ ಅನುಕೂಲವಾಗಲಿದೆ. ಪ್ರಮುಖ ಧಾರವಾಡ, ವಿಜಯಪುರ, ಬೆಳಗಾವಿ, ಚಿಕ್ಕಮಗಳೂರು, ಚಾಮರಾಜನಗರ, ಬಳ್ಳಾರಿ, ಬೆಂಗಳೂರು, ಬಾಗಲಕೋಟೆ, ವಿಜಯನಗರ, ಉತ್ತರ ಕನ್ನಡ, ಗದಗ, ರಾಯಚೂರು, ಚಿತ್ರದುರ್ಗ, ಧಾರವಾಡ, ಶಿವಮೊಗ್ಗ ಜಿಲ್ಲೆಗಳಲ್ಲಿ ಈ ರೈಲುಗಳು ಸಂಚಾರ ನಡೆಸಲಿವೆ.
ಸಣ್ಣ ಪಟ್ಟಣದ ಜನರಿಗೆ ಭಾರೀ ಅನುಕೂಲ!
ಮೆಮು ಮತ್ತು ಡೆಮು ಹೆಸರು ಬದಲಾವಣೆಗೂ ರೈಲ್ವೇ ಇಲಾಖೆ ಮುಂದಾಗಿದೆ. ಇವುಗಳನ್ನು ಜನಸಾಮಾನ್ಯರ ಸಾರಿಗೆಯಾಗಿ ಮಾರ್ಪಾಡು ಮಾಡಲಾಗುತ್ತಿದೆ. ಇಲ್ಲಿಯವರೆಗೆ ಮೆಮು ಮತ್ತು ಡೆಮು ಎಂಬ ತಾಂತ್ರಿಕ ಹೆಸರುಗಳಿಂದ ಕರೆಯಲ್ಪಡುತ್ತಿದ್ದ ಈ ರೈಲುಗಳ ಹೆಸರನ್ನು ಬದಲಾಯಿಸಲು ರೈಲ್ವೇ ಸಚಿವಾಲಯ ಚಿಂತಿಸಿದೆ. ಜನಸಾಮಾನ್ಯರಿಗೆ ಈ ಹೆಸರುಗಳು ಕಬ್ಬಿಣದ ಕಡಲೆಯಂತಿದ್ದು, ಸುಲಭವಾಗಿ ಅರ್ಥವಾಗುತ್ತಿಲ್ಲ. ಈ ಹಿನ್ನೆಲೆಯಲ್ಲಿ, ರೈಲ್ವೇ ಸೇವೆಯನ್ನು ಜನರಿಗೆ ಹತ್ತಿರವಾಗಿಸಲು ಇವುಗಳನ್ನು ಇನ್ನು ಮುಂದೆ ಇಂಟರ್ಸಿಟಿ ಎಕ್ಸ್ಪ್ರೆಸ್ ಎಂಬ ಹೆಸರಿನಲ್ಲಿ ಓಡಿಸಲಾಗುತ್ತದೆ. ಇದರಿಂದ ಪ್ರಯಾಣಿಕರಿಗೆ ಈ ರೈಲುಗಳ ಬಗ್ಗೆ ಹೆಚ್ಚಿನ ಸ್ಪಷ್ಟತೆ ಸಿಗಲಿದೆ.
ಈ ಯೋಜನೆಯ ಅತಿದೊಡ್ಡ ಪ್ಲಸ್ ಪಾಯಿಂಟ್ ಎಂದರೆ ಸಣ್ಣ ರೈಲ್ವೇ ನಿಲ್ದಾಣಗಳಲ್ಲಿ ಸ್ಟಾಪ್ ಇರೋದು. ಹೆಬ್ಸೂರು, ಅಣ್ಣಿಗೇರಿ, ಹುಲಕೋಟಿ, ಅಳ್ನಾವರದಂತಹ ಸಣ್ಣಪುಟ್ಟ ಊರುಗಳ ಜನರಿಗೆ ಎಕ್ಸ್ಪ್ರೆಸ್ ರೈಲುಗಳ ಸೌಲಭ್ಯ ಸಿಗುತ್ತಿರಲಿಲ್ಲ. ಈಗ ಮೆಮು ರೈಲುಗಳು ಪ್ರತಿ ನಿಲ್ದಾಣದಲ್ಲೂ ನಿಲ್ಲುವುದರಿಂದ ರೈತರು, ಸಣ್ಣ ವ್ಯಾಪಾರಿಗಳು, ವಿದ್ಯಾರ್ಥಿಗಳು ಮತ್ತು ದಿನನಿತ್ಯದ ಕೆಲಸಕ್ಕೆ ಹೋಗುವ ನೌಕರರಿಗೆ ಇದು ಸಂಜೀವಿನಿಯಾಗಲಿದೆ. ಎಕ್ಸ್ಪ್ರೆಸ್ ರೈಲುಗಳು ಕಡಿಮೆ ಕಡೆ ನಿಲ್ಲುವುದರಿಂದ ಅವುಗಳ ವೇಗ ಹೆಚ್ಚಲಿದೆ ಮತ್ತು ಮೆಮು ರೈಲುಗಳು ಸ್ಥಳೀಯ ಸಂಚಾರವನ್ನು ಸುಲಭಗೊಳಿಸಲಿವೆ.
ಏನಿದು ಮೆಮು ರೈಲು? ವಿಶೇಷತೆ ಏನು?
ಮೆಮು ರೈಲುಗಳ ವಿಶೇಷತೆಗಳನ್ನು ನೋಡಿದರೆ, ಪ್ರಯಾಣಿಕರ ದಟ್ಟಣೆಗೆ ಅನುಗುಣವಾಗಿ ಈ ರೈಲುಗಳಲ್ಲಿ 4, 8, 12 ಅಥವಾ ಗರಿಷ್ಠ 16 ಬೋಗಿಗಳನ್ನು ಅಳವಡಿಸಲು ಅವಕಾಶವಿದೆ. ಸಾಮಾನ್ಯವಾಗಿ 80 ಕಿಮೀ ನಿಂದ 200 ಕಿಮೀ ಅಂತರದ ನಗರಗಳ ನಡುವೆ ಈ ರೈಲುಗಳು ಸಂಚರಿಸುತ್ತವೆ. ರೈಲಿನ ಎರಡೂ ತುದಿಗಳಲ್ಲಿ ಲೋಕೋ ಇಂಜಿನ್ಗಳನ್ನು ಅಳವಡಿಸಲಾಗಿರುತ್ತದೆ. ಇದು ರೈಲನ್ನು ಹಿಂತಿರುಗಿಸುವ ಅಗತ್ಯವಿಲ್ಲದೆ ಎರಡೂ ದಿಕ್ಕಿನಲ್ಲಿ ಸುಲಭವಾಗಿ ಚಲಿಸಲು ನೆರವಾಗುತ್ತದೆ. ಅಂದ್ರೇ ಪುಷ್ ಫುಲ್ ಟೆಕ್ನಾಲಜಿಯಿದ್ದು, ಇದರಿಂದ ಸಮಯದ ಉಳಿತಾಯವಾಗುತ್ತದೆ.
